Неделата заврши со раст на акциите, нафтата и биткоинот, а доларот падна

Американските акции заздравеа на крајот од овонеделното тргување, бидејќи амриканскиот долар падна, со што го поттикна расположението на трговците.

S&P 500 го прекина тринеделниот период на загуби и порасна за 1,53 отсто. Индексот Nasdaq порасна за 2,11 отсто, а Dow за 1,19 отсто.

Доларот се спушти од своето рекордно високо ниво, што се одрази на вредноста на биткоинот и на суровините.

Трговците им пркосеа на острите забелешки и расположение на банкарите на американските Федерални резерви (ФЕД) и на загриженоста од економски пад.

Трговците очекуваат големо покачување на каматите во септември, после зголемувањето од 75 базни поени во јуни и јули. Претседателот на ФЕД во Сент Луис, Џејмс Балард, рече дека се наближуваат кон третото по ред зголемување на каматната стапка за толкав процент. Неговата колешка од Канзас Сити, Естер Џорџ, потенцираше дека официјалните лица ќе продолжат да ја подигнуваат каматната стапка, а тоа го потврди и гувернерот на ФЕД, Кристофер Волер, кој рече дека се залагаат за уште едно значајно покачување на каматите.

Биткоинот забележа најголем скок во последните повеќе од месец дена, преминувајќи го психолошки значајното ниво од 20.000 долари и продолжувајќи да се движи кон границата од 21.000 долари. Биткоинот во септември заглави во најтесна рамка на тргување во последните две години, главно поради неизвесноста од тоа колку далеку ќе одат централните банки со подигнување на каматните стапки, соочени со забавувањето на светската економија.

Нафтата значајно порасна откако неделава падна на шестмесечен минимум, бидејќи намалената вредност на доларот ја поттикна побарувачката од трговците. Така, West Texas Intermediate (WTI) се тргуваше на ниво од околу 86 долари за барел, анулирајќи го падот забележан во претходните денови од овонеделното тргување, кога и WTI и Брент суровата нафта паднаа на најниско ниво од почетокот на годинава.