Хеџ – фондовите масовно купуваат азиски акции

Пазарите во развој и развиените азиски земји минатата недела го забележаа најголемото нето-купување од страна на хеџ - фондовите откако трговскиот аналитички центар на „Голдман Сакс“ почна да ги следи податоците во 2016 година. Причината за ова е што  регионот има корист од оптимизмот за фирмите поврзани со  инфраструктура за вештачката интелигенција.

Хеџ - фондовите беа нето купувачи на глобални акции минатата недела, прв пат по три недели, при што парите беа придвижувани кон сите главни пазари - но Азија се издвојуваше, според белешката од центарот. Пазарите во развој продолжуваат да ги надминуваат останатите по перформансите бидејќи инвеститорите ротираат надвор од трендовите на моментумот, но исто така реагираат на слабеењето на американскиот долар.

Индексот MSCI EM е во пораст од 11 отсто од почетокот на годината, додека јужнокорејскиот индекс Kospi се зголеми за над 30 отсто - потпомогнат од големите корпорациски имиња како што се „Самсунг“ (Samsung Electronics Co. Ltd)  и „СК Ксиникс“ (SK Hynix Inc.), споредено со пад од 0,1 отсто на S&P 500 по завршување на тргувањето во петокот.

Во белешка до клиентите, бирото на „Голдман“ изјави дека купувањето акции што се очекува да растат (т.н. long buys) го поттикналo поголемиот дел од динамиката на азиските пазари минатата недела, надминувајќи ги покривањата на кратките позиции (т.н. short covers) со сооднос од 8,4 спрема 1.

Во однос на глобалните сектори, бирото изјави дека купувањето на акции од информатичката технологија, индустриски производи, основни производи и материјали го надминало темпото на продажба во сите други области. Најмногу се продавале акции од компании за потрошувачки дискрециони производи, комуникациски услуги и финансиски производи.

Хеџ - фондовите продавале акции од американскиот сектор за недвижности трета недела по ред, и со најбрзо темпо од септември 2022 година, поттикнато од долгите и кратките продажби, додаде бирото. Истакна дека продажбата на акции од  специјализирани инвестициски компании за недвижности (REIT), од фирми за управување и развој на недвижности и компании за инвестирање во индустриски деловен простор го надминала скромното купување удели во компаниите за инвестирање во хотели, ресорти и во здравствена заштита.