text size
Европските берзи го завршија февруари со раст и ја продолжија најдолгата низа на месечни добивки уште од 2013 година, додека сè повеќе инвеститори бараат алтернатива за американскиот пазар.
Индексот Stoxx Europe 600 утрово околу 9:52 часот во Лондон порасна за 0,3 отсто и достигна ново рекордно ниво. Во февруари индексот се зголеми за околу четири проценти и е на пат да забележи осми последователен месец на раст. Во петокот најдобро поминаа телекомуникациските компании и рударите, додека секторот за патувања заостануваше.
Европските акции го одржуваат растечкиот тренд, бидејќи високите вредности на американските технолошки компании и загриженоста за трошоците поврзани со вештачката интелигенција (ВИ) поттикнуваат некои од инвеститорите да го пренасочат капиталот во други региони. Дополнителен поттик дојде и од генерално солидната сезона на деловни извештаи.
Структурата на пазарот оди во прилог на Европа во момент кога некои од инвеститорите се плашат од нарушувањата што би можела да ги предизвика вештачката интелигенција. Од почетокот на годината секторите на „стара економија“, како што се основни ресурси, енергетика, телекомуникации и комунални услуги, го надминаа пазарот и остварија двоцифрени приноси, во некои случаи и до 25 отсто, додека Stoxx 600 порасна за седум проценти. Покрај тоа, европските компании најавија рекорден откуп на сопствени акции.
Европските акции ја забележаа најдолгата низа на раст од 2013 година
Bloomberg
Растот во февруари го „поткрепија силните корпоративни резултати и позитивниот замав“, изјави Улирих Урбан, раководител на стратегија за повеќе класи на средства во „Беренберг“. Тој додаде дека продолжуваат да ја одржуваат зголемената изложеност на европските и на пазарите во развој, бидејќи очекуваат дека новиот капитал првенствено ќе биде насочен кон тие региони, со цел инвеститорите да ја намалат понатамошната висока изложеност на американскиот пазар.
Меѓу поединечните акции, БАСФ (BASF) ослабе откако германскиот производител соопшти дека годинава очекува ниво на добивка слично како минатата. Од друга страна, „Свис Ре“ (Swiss Re) забележа силен раст откако објави неочекувана програма за откуп на акции.
Макс Кетнер, стратег во ХСБЦ (HSBC), кој оваа недела го зголеми уделот на европските акции во своето портфолио, смета дека инвеститорите премногу се фокусираат на приказната за вештачката интелигенција.
„Веројатно го пропуштаме фактот дека под површината се одвива вистинско циклично закрепнување“, рече тој за телевизијата „Блумберг“. „Помалите индустриски ориентирани економии во последните два месеца забележуваат конкретно забрзување на активноста“.
Според податоци на ЕПФР (EPFR Global) на кои се повикуваат стратези од Банката на Америка (Bank of America), европските фондови за акции во седмицата до средата привлекле 3,2 милијарди долари, што е четврти последователен неделен прилив. Од почетокот на годината инвеститорите вложиле околу 18 милијарди долари во европски фондови, додека фондовите насочени кон американскиот пазар собрале 36,8 милијарди долари.
.webp){kind=icon}
