2TM Participacoes SA, холдинг-компанијата која е сопственик на бразилската „Меркадо биткоин“ (Mercado Bitcoin SA), отпуштила околу 90 вработени, повеќе од 10 отсто од својата работна сила, тврдат извори запознаени со ситуацијата, кои побарале да останат анонимни бидејќи бројот не е официјално објавен.
Во соопштение, кое не го вклучува точниот број на засегнати луѓе, 2TM вели дека мерката е неопходна поради макроекономската клима. Во соопштението се наведуваат зголемените каматни стапки, инфлацијата и тековните глобални финансиски услови.
Во ноември, 2TM собра 50 милиони долари од инвеститори, вклучително и „Трајб капитал“ (Tribe Capital) и „10Т холдингс“ (10T Holdings). Претходно годинава, компанијата беше поврзана со потенцијален договор со „Коинбејс глобал“ (Coinbase Global Inc.) што би можел да резултира со контролно стекнување или продажба на малцински удел. Разговорите завршија на почетокот на мај.
„Коинбејс“, која се соочи со свои финансиски предизвици, во четвртокот соопшти дека ќе го продолжи замрзнувањето на вработувањата и ќе отфрли одредени понуди за работа. Таа објава уследи по сличен потег од страна на „Џеминај“ (Gemini), од каде соопштија дека ќе намалат 10 отсто од својата работна сила, но и резовите од „Рејн фајненшл“ (Rain Financial) со седиште во Бахреин.
2TM е најмалку втората крипто фирма поддржана од „Софтбенк“ (Softbank) која ја намали својата работна сила во Латинска Америка за да ги намали трошоците во последниве недели, бидејќи во тековната т.н. „крипто зима“ вредноста на токените како биткоин и етер значително опадна во споредба со нивните рекордни нивоа.
Кон крајот на мај, крипто берзата „Битсо“ (Bitso) со седиште во Мексико соопшти дека отпуштила 80 вработени од работната сила од над 700 луѓе.
.webp){kind=icon}
