Биткоинот надмина 30.000 долари за првпат од јуни 2022

Биткоинот се искачи над 30.000 долари за првпат од јуни 2022 година, зајакнувајќи повеќе од 80 отсто од почетокот на годината.

Закрепнувањето е уште поинтензивно од речиси 20-процентната добивка што ја постигна Nasdaq 100, индекс со кој биткоинот има тенденција да се движи во тандем, и надоместува дел од загубите на дигиталниот токен од 2022 година, по серијата колапси во криптосферата. Сепак, биткоинот е намален за повеќе од 50 отсто од својот историски максимум во ноември 2021 година.

„Триесет илјади се многу значајни и од технички и од фундаментални причини“, вели Мати Гринспен, извршен директор на „Квантум економикс“ (Quantum Economics). Отпорот се таложеше три недели по ред и сега конечно е скршен. Ова е првпат да го надминеме тоа ниво по колапсот на тера и луна и „Три ероус“ (Three Arrows Capital). Тоа во основа значи дека цената целосно закрепна од колапсот на „Целзиус“ (Celsius), FTX и регулаторниот удар во САД.

Пробивот на биткоинот над 30.000 долари доаѓа по т.н. притисок од Болинџеровиот појас (анг. Bollinger Band), поради што историската нестабилност падна на најниско ниво од јануари. Компресијата потоа резултираше со нагло движење нагоре, што изгледа слично на пробивот забележан во вторникот. Трговците што ги следат техничките модели сега можеби гледаат на територијата од 30.800 долари како прва потенцијална цел, а потоа 31.200 долари.

Криптоиндустријата сè уште се соочува со обемни испитувања. Криптоберзата „Коинбејс“ (Coinbase Global Inc.) објави дека добила известување од Комисијата за хартии од вредност на САД (SEC) во кое се наведува дека регулаторот има намера да почне извршна постапка. SEC го тужеше криптомагнатот Џастин Сан за наводно прекршување на правилата за хартии од вредност во случај од кој Сан се огради. Дополнително, американската комисија за тргување со фјучерси на стоки ги тужеше основачот на „Бајненс“ (Binance), Чангпенг Жао, и неговата криптоберза за наводно прекршување на прописите за деривати, иако „Бајненс“ соопшти дека не се согласува со многу од категоризациите на агенцијата.

И покрај сето тоа, биткоинот порасна во текот на изминатиот месец, по колапсот на три американски банки, оживувајќи го наративот меѓу криптооптимистите дека токенот нуди поатрактивна алтернатива за традиционалните финансии.

Покрај тоа, аналитичарите велат дека падот на ликвидноста до 10-месечен минимум - откако главните играчи на пазарот го загубија пристапот до банкарските услуги обезбедени од „Силвергејт“ (Silvergate Capital Corp.) и „Сигначур“ (Signature Bank) - исто така би можел да го објасни закрепнувањето, барем делумно. Со помал обем на тргување, промените на цените може да изгледаат подраматично.

„Книгите за нарачки се тенки, а трговската активност е намалена“, вели Страхиња Савиќ, шеф за податоци и аналитика во ФРНТ (FRNT Financial). „Под овие околности, може да видиме ценовно дејство што е тешко да се поврзе со која било причина“.

Во моментов нема коментари за веста. Биди прв да коментира...

Остави коментар