„Бајненс“ и регулаторот во САД бараат решение за да се избегне замрзнување на имотот

„Бајненс“ (Binance.us) и Комисијата за хартии од вредност на САД (SEC) се согласија да работат на договор со кој ќе се избегне целосно замрзнување на средствата на платформата за тргување со криптовалути, која регулаторот ја обвини дека работи незаконски.

Окружнaта судијка во САД, Ејми Берман Џексон, во вторникот рече дека двете страни „не се толку далеку“ од решение за тоа како да се заштитат милијарди долари од средствата на клиентите без да се затвори берзата, додека е во тек тужбата на SEC. Таа упати прекршочни судии да работат на компромисен договор.

„Со деталите подобро да се занимавате вие отколку јас“, рече Џексон за време на сослушувањето во Вашингтон. Судијката рече дека доколку се постигне договор, таа повеќе нема да мора да одлучува за барањето на SEC за замрзнување на имотот.

SEC минатата недела побара замрзнување на имотот за „Бајненс“, платформата за тргување во сопственост на основачот на „Бајненс холдингс“ (Binance Holdings Ltd.), Чангпенг Жао. Во својата жалба од 5 јуни, SEC ги обвини „Бајненс“ и Жао за лошо постапување со средствата на клиентите, заведување на инвеститорите и регулаторите и прекршување на правилата за хартии од вредност.

„Бајненс“, кој се бори против тужбата на SEC и тврди дека средствата на клиентите се безбедни, за време на сослушувањето алармираше дека блокирањето на протокот на сите средства ќе го осакати бизнисот и ќе им наштети на клиентите.

„Немаме намера да прифатиме смртна казна осум дена по почнувањето на нашиот случај“, рече еден од адвокатите на „Бајненс“.

„Берзата треба да може да ги покрие обичните деловни трошоци, како што се плаќањата за кирија, платите, доставувачите и лиценцирањето софтвер“, рече адвокатот на „Бајненс“. „Областа што нè загрижува е замрзнувањето на имотот, што ќе биде погрешно протолкувано од банките“, додаде тој.

Судијката се согласи со тоа. „Целосно исклучување ќе создаде значителни последици, не само за компанијата туку и за пазарите на дигитални средства воопшто“, рече таа за време на сослушувањето.

Според тужбата, „Бајненс“ неправилно префрлил милијарди долари средства од клиентите на банкарска сметка на ентитет контролиран од Жао. Тие средства биле префрлени на трета страна, а потоа се чини дека се користат за купување и продавање криптовалути, нагласи регулаторот.

 „Бајненс“, како одговор на барањето на SEC да ги замрзне средствата, предложи компромис што би вклучил пренос на криптосредства на американските клиенти во нови паричници, со нови приватни клучеви што би биле под единствена контрола на претставници на „Бајненс УС“, со седиште во САД.

Оперативни трошоци

Како дел од својот предлог, берзата исто така побара дозвола да продолжи да ги плаќа вработените и да ги покрива оперативните трошоци, притоа ветувајќи дека нема да му бидат префрлени средства или какви било плаќања на кој било ентитет на „Бајненс“ без налог од судија.

SEC во својот предлог за порамнување поднесен до судот побара „Бајненс“ да ги врати средствата на клиентите во САД, каде што ќе бидат контролирани од ентитети надвор од дофатот на Жао и ќе можат да се занимаваат со откупот за клиентите.

Чангпенг Жао Bloomberg

За време на сослушувањето, еден адвокат на SEC рече дека регулаторот е отворен за „прецизно скроен исклучок“ од какво било замрзнување што ќе му овозможи на „Бајненс УС“ да ги покрие своите операции. Регулаторот побара „Бајненс УС“ да обезбеди пресметки за своите деловни трошоци и надоместоци за подобро да се разбере што е потребно за платформата да продолжи со работа.

Судијата му нареди на „Бајненс УС“ да достави список на своите деловни трошоци до среда.

Адвокатот на SEC рече дека замрзнувањето на имотот е неопходно поради ризикот „Бајненс“ да ги пренесе средствата на клиентите во странство.

Во претходен меморандум, SEC посочи дека „Жао и 'Бајненс' имаат шема и практика на мешање на средствата од клиентите“, како и „преместување средства надвор од САД и/или на блокчејн, каде што се надвор од дофатот на овој суд“.

Во белешката се наведува дека имотот на клиентите на „Бајненс УС“ изнесува повеќе од 2,2 милијарди долари, Жао се опишува како „странски државјанин, кој отворено ги изразил своите ставови дека не е предмет на јурисдикција на овој суд“.

Во моментов нема коментари за веста. Биди прв да коментира...

Остави коментар