Биткоинот падна од шестнеделниот максимум

Биткоинот падна од шестнеделниот максимум, откако скокот на приносите на обврзниците ја намали побарувачката за поризични инвестиции.

Највредната дигитална монета падна дури за 1,9 отсто во вторникот, пред да закрепне делумно и да го задржи нивото од 27.600 долари во 10.50 часот во Сингапур. Индексот MarketVector Digital Assets 100 на највредните криптовалути падна за 1,2 отсто.

Биткоинот во понеделникот надмина 28.500 долари, потпомогнат од напливот на оптимизам за пошироко усвојување на криптото по лансирањето фондови со кои се тргува на берзата врз основа на фјучерси на етериум во САД. Но овие финансиски производи не успеаја да привлечат толкав интерес како сличните производи базирани на биткоин лансирани за време на бумот на дигиталните средства во 2021 година.

„Зголемувањето на цените беше краткотрајно бидејќи макроопкружувањето сè уште е лошо во однос на цените“, рече Цици Лу Мекалман, основач на консултантската компанија за блокчејн „Вен линк партнерс“ (Venn Link Partners). „Зголемените приноси на американските обврзници го оптоварија биткоинот“.

Зголемените приноси се предизвик за шпекулативните средства како крипто Bloomberg

Приносот на 10-годишната обврзница е близу највисокото ниво од 2007 година, како одраз на растечките очекувања за подолг период на задржување на повисоки каматни стапки од страна на Федералните резерви (Фед) за да се смири инфлацијата. Построгите финансиски услови се пречка за класите на средства како акции и крипто.

Секторот за дигитални средства исто така е подготвен за судењето на Сем Банкмен-Фрид поради колапсот на берзата FTX минатиот ноември. Тој ги отфрли обвиненијата за измама и перење пари, но може да се соочи со долга затворска казна доколку биде прогласен за виновен. Изборот на судија започнува во вторник, пред правните постапки што ќе ги истакнат замките во криптоиндустријата.

„Во текот на изминатите 11 месеци, обемот на тргување со крипто и длабочината на пазарот достигнаа повеќегодишно ниско ниво заедно со нестабилноста на цените“, напиша во белешка истражувачката компанија „Каико“ (Kaiko), додавајќи дека најлошото  „за среќа е зад нас“ и изразувајќи надеж дека судењето ќе обезбеди затворање на целата приказна, што е многу потребно.

Сезоната носи утеха

Биткоинот годинава порасна за 67 отсто, што е делумно закрепнување во однос на слабите перформанси во 2022 година.

Оние што веруваат во статистиката наоѓаат утеха во сезонските движења на биткоинот, бидејќи октомври има тенденција да биде силен месец. Во текот на изминатата деценија, криптовалутата порасна во просек за 24 проценти во октомври, според податоците собрани од „Блумберг“.

„Каико“ посочи дека биткоинот сè повеќе доминира во трговијата со крипто во САД, со 71 отсто од обемот на тргување на американските берзи во септември, од 66 отсто во март, под удар од банкарските превирања.

Институционалните трговци можеби се префрлија во биткоин „среде зголемените реални приноси и влошувањето на расположението за ризик на глобално ниво“, наведуваат од „Каико“.