Вредноста на биткоинот продолжи да расте достигнувајќи ја највисоката цена од мај минатата година. Растот е поттикнат од очекувањата за свежа побарувачка од берзанските фондови. Најголемото дигитално средство порасна за дури 11,5 проценти до врвот од 35.000 долари и се тргуваше за 34.450 долари утрово во Лондон.
Можното одобрување на првиот биткоин-ЕТФ во САД, што се очекува во наредните недели предизвика шпекулативен жар за токенот. Менаџерите на средства „Блекрок“ (BlackRock Inc.) и „Фајделити Инвестментс“ (Fidelity Investments) се меѓу оние кои се во трка да понудат такви производи. Управувачите со дигитални средства тврдат дека отворањето на ваков ЕТФ ќе го прошири усвојувањето на криптовалутата.
Американскиот федерален апелационен суд во понеделникот ја официјализираше победата на „Грејскејл Инвестментс“ (Grayscale Investments LLC) во нејзиниот обид да создаде биткоин ЕТФ на што се противеше Комисијата за хартии од вредност на САД.
Комисијата се спротивставуваше на отворањето ЕТФ-ви кои инвестираат директно во биткоин, со образложение дека постојат ризиците од измами и манипулации на основниот пазар. Судската одлука и мноштвото апликации од големите инвестициски компании за отворање вакви фондови ги поттикнаа шпекулациите дека Комисијата ќе попушти.
Аналитичарот на „Блумберг Интелиџенс“ (Bloomberg Intelligence) за ЕТФ, Ерик Балчунас преку X, платформата порано позната како Твитер соопшти дека „Ајшерс Биткоин Траст“ (iShares Bitcoin Trust) е излистан на ДТЦЦ (DTCC - Depository trust and clearing Corp.) со ознаката ИБТЦ (IBTC).
Bloomberg
„Блекрок“, најголемиот светски менаџер на средства управува со бизнисот „Ајшерс“. ДТЦЦ е институција која работи клиринг и порамнувања на американските пазари.
„Ова не значи дека тој е технички одобрен“, рече Балчунас во интервју. „Работата не е завршена, но ова е краен чекор пред отворање ЕТФ. Кога се додава тикер, тоа значи дека фондот е пред лансирање“.
Биткоинот, исто така, порасна за 10 проценти на почетокот на минатата недела поради возбудата за отворањето биткоин ЕТФ. Тогаш, во погрешен извештај се тврдеше дека „Блекрок“ добил одобрение за лансирање на фондот што предизвика раст, кој брзо спласна откако грешката излезе на виделина.
Етер, вториот по големина токен, скокна за 6,4 проценти и надмина 1.800 долари денеска користејќи го бранот на биткоинот, а раст забележаа и помалите монети како што се BNB, XRP и „доџкоин“ (дogecoin).
Податоците на „Коинглас“ (Coinglass) покажуваат дека позициите за трговија со крипто вредни околу 387 милиони долари, главно од шпекуланти кои се обложувале на пониски цени, биле ликвидирани во изминатите 24 часа.
Американската Комисија за хартии под вредност веќе дозволи ЕТФ да вложуваат во биткоин и етер. Но, агенцијата ги интензивираше мерките за зауздување на крипто-пазарот по минатогодишниот пад и ударите како банкротот на берзата ФТХ (FTX), чиј ко-основач Сем Бенкмен-Фрид е на суд за измама.
Аналитичарите на БИ, Елиот Стајн и Џејмс Сејфарт рекоа дека „одобрувањето на биткоин ЕТФ се чини неизбежно“ и дека група фондови најверојатно ќе добијат зелено светло, иако времето останува неизвесно.
Биткоинот останува под својот врв од ерата на пандемијата во 2021 година од речиси 69.000 долари, притиснат од зголемените каматни стапки што ја погодија побарувачката за ризични средства. Корелациите на токенот со средствата како што се акциите, обврзниците и златото се намалија во последно време, предизвикувајќи прашања за тоа дали главните инвеститори се ослободиле од средствата.
„Ликвидноста е нешто подобра од порано“, рече Џастин д’Анетан, шеф за развој на бизнисот во Азија Пацифик во производителот на крипто пазари „Кирок“ (Keyrock). „Цените сега закрепнаа, а со тоа и одредена количина на ликвидност - сепак тоа ништо во споредба со еуфоријата од 2020-2021 година“.
.webp){kind=icon}
