Сем Бaнкмен-Фрид, кому му се суди за измама во Њујорк, не е единствениот основач на крипто на кој му гори под нозе.
Индексот на милијардери на „Блумберг“ ја намали својата процена за приходите на криптоберзата „Бајненс“ (Binance) за 38 отсто откако податоците покажаа дека обемот на фирмата се намали оваа година. Тоа избриша 11,9 милијарди долари од богатството на основачот на „Бајненс“, Чангпенг Жао, познат како CZ, намалувајќи го на 17,2 милијарди долари.
Жао (46) одигра улога во настаните што го доведоа Банкмен-Фрид пред федералниот суд. Во ноември, основачот на „Бајненс“ објави дека ликвидира токен поврзан со FTX по извештајот дека хеџ-фондот на Банкмен-Фрид, „Аламеда рисрч“ (Alameda Research), исто така поседува голема позиција во него. Некои клиенти на FTX побрзаа да повлечат пари и берзата не можеше да го следи налетот на повлекувања. Помалку од една недела подоцна прогласи банкрот.
Тоа го сведе личното богатство на Банкмен-Фрид на нула, откако достигна врв од 26 милијарди долари во март минатата година.
Индексот ги пресметува приходите на „Бајненс“ користејќи спот и податоци за дериватите од сервиси како „Коингеко“ (Coingecko) и „Коинпаприка“ (Coinpaprika).
„Бајненс“ доби пазарен удел претходно оваа година, достигнувајќи го врвот со 62 отсто од вкупните криптотргувања на берзата во првиот квартал, благодарение на промоцијата за нула провизија за популарните трговски парови. Откако заврши понудата, уделот на „Бајненс“ се лизна на 51 отсто на крајот на третиот квартал, според истражувачката компанија „ЦЦ Дата“ (CCData).
Претставници на „Бајненс“ не одговорија на барањето за коментар.
Во последниве месеци криптоберзата стануваше сè поизолирана од традиционалниот финансиски систем.
Комисијата за хартии од вредност го тужеше „Бајненс“ во јуни, а Комисијата за тргување со фјучерси на стоки тргна по него на почетокот на оваа година поради избегнување на правилата што им дозволуваа на американските корисници да пристапат до „Бајненс“. Регулаторните претставници тврдеа дека фирмата нема соодветни контроли за перење пари, зголемен обем на тргување и за погрешно управување со имотот на клиентите. „Бајненс“ ги оспорува наводите и се бори со нив на суд.
Во јуни индексот на богатството на „Блумберг“ ја намали вредноста на американската берза на „Бајненс“ на нула, откако објави дека повеќе нема да врши трансакции во долари, со што обемот драстично се намали. „Бајненс САД“ (Binance US) беше проценет на 4,7 милијарди долари во кругот на финансирањето во март 2022 година, додека нето-вредноста на Жао достигна врв од 96 милијарди долари во јануари истата година.
Болката не е ограничена на „Бајненс“, бидејќи регулаторната несигурност и зголемените каматни стапки ги прават другите инвестиции попривлечни. Обемот на самото тргување во „Коинбејс глобал“ (Coinbase Global Inc.) падна за 52 отсто во третиот квартал од претходната година, според „ЦЦ Дата“.
.webp){kind=icon}
