„Бајненс“ (Binance Holdings Ltd.) имала толку слаба контрола врз трансакциите со криптовалути на својата берза што терористите, хакерите и прекршителите на санкции ја користеле со години за да префрлат милијарди долари, соопштија американските обвинители.
„Бајненс“ и извршниот директор Чангпенг Жао се изјаснија за виновни по кривичната пријава во вторникот, потврдувајќи дека не ги презеле основните чекори против перењето пари, кои се во основата на владините напори да се контролира протокот на валкани трансакции низ светот. „Бајненс“ ќе плати 4,3 милијарди долари, додека Жао, освен што ќе се повлече од функцијата извршен директор, ќе плати и казна од 50 милиони долари.
Прочитајте повеќе: Ненадејниот пад на Чангпенг Жао, криптоџинот зад „Бајненс“
Неверојатниот пресврт на настаните значи дека Жао, најмоќната фигура на светската криптосцена, се соочува со затвор и повеќе нема да ја води најголемата берза во индустријата. Сето ова доаѓа по долгогодишна истрага од страна на американските сојузни обвинители и осудувањето на пропаднатиот основач на неуспешната берза FTX, Сем Банкмен-Фрид, за измама во почетокот на месецов.
Според американското министерство за правда и Мрежата за спречување финансиски криминал (FinCEN), вработените во „Бајненс“ учествувале во широк спектар несоодветни дејства, а многумина биле свесни за последиците од дозволувањето на милионските нелегални трансакции.
„Компанијата 'Бајненс' ги затворила очите пред своите законски обврски во потрага по профит“, посочи министерката за финансии Џенет Јелен во соопштение. „Нејзините намерни пропусти овозможиле парите да течат низ нејзината платформа до терористи, сајбер-криминалци и злоупотребувачи на деца“.
Џенет Јелен
Bloomberg Mercury
Поради тие пропусти, како што велат американските власти, од „Бајненс“ дозволиле да се случи следново:
- Бригадите Ал касам, воено крило на Хамас, користеле трансакции со биткоин за да соберат пари за палестинскиот отпор. Хамас, кој е прогласен за терористичка организација од САД, уби повеќе од 1.200 Израелци на 7 октомври. Според ФинЦЕН, „Бајненс“ не поднела извештаи за сомнителни активности во САД поврзани со собирање средства на Хамас.
- „Бајненс“ дозволил трансакции со биткоин поврзани со други терористички организации, вклучувајќи ги Ал каеда и ИСИС, соопшти ФинЦЕН.
- Најмалку 1,1 милион трансакции во вредност од 899 милиони долари биле направени од луѓе што живеат во Иран, што ги прекршува американските санкции, призна компанијата.
- Корисниците на берзата во Куба и во Сирија, како и во украинските региони Крим, Донецк и Луганск, учествувале во трансакции вредни милиони долари со што ги прекршиле американските санкции, призна „Бајненс“.
- Корисниците на „Бајненс“ имале 275 милиони долари депозити од „Бест миксер“ (BestMixer), криптоплатформа што помогнала да се покрие трагата на дигиталните пари, соопшти компанијата. Холандските власти го затворија во 2019 година, велејќи дека „најверојатно се користел за прикривање и перење криминални текови на пари“.
- Корисниците префрлиле 106 милиони долари во биткоини од „Хидра маркет“ (Hydra Market), руски даркнет-пазар, кон паричниците на „Бајненс“ меѓу 2017 и 2022 година, призна компанијата. Американските и германските власти ги запленија серверите на „Хидра“ во 2022 година, нарекувајќи ја најголемиот и најистакнат даркнет-пазар во светот. На неа се продавале хакерски софтвер, лажни лични документи и дроги како хероин, кокаин и ЛСД.
- Адресите на „Бајненс“ обработиле десетици милиони долари во трансакции што вклучуваат 24 типа на малициозен софтвер, со имиња како „Самсам“ (SamSam), „Сејтан“ (Satan) и „Вана крај“ (WannaCry). Иако компанијата соработувала со органите за спроведување на законот, кога била известена за тоа, ги криела клучните информации од властите за тие напади, посочија од ФинЦЕН. Во 2021 година, САД обвинија тројца севернокорејски воени хакери за напад „Вана крај“.
- Повеќе од 1.000 трансакции се случиле на три платформи што се занимаваат со детска порнографија и сличен материјал, посочија од ФинЦЕН. Администраторот на една од тие страници, „Дарк скандалс“ (Dark Scandals), беше обвинет во 2020 година. Веб-страницата содржела видеа од силување.
.webp){kind=icon}
Во моментов нема коментари за веста. Биди прв да коментира...