text size
Биткоинот е на работ да постигне победничка серија на нивото од пред една година. Движењето на цената е под влијание на неодамна лансираните американски ЕТФ (од англ. берзански фондови), кои директно инвестираат во таа монета.
Криптовалутата поскапе за околу еден процент, на 48.436 долари, во 9.50 часот во понеделникот во Сингапур и е подготвена за седма дневна добивка, што ќе ја обележи нејзината најдолга низа од јануари 2023 година, покажаа податоците собрани од „Блумберг“.
Девет нови биткоин-фондови започнаа со тргување во САД на 11 јануари и досега привлекоа повеќе од девет милијарди долари прилив на инвеститори. Средствата на „Блекрок“ и на „Фиделити“ се рангирани како ЕТФ со најдобри резултати врз основа на парите собрани по еден месец на пазарот, напишаа во белешка аналитичарите на „Блумберг“ Ерик Балчунас и Џејмс Сејфарт.
Bloomberg
Има знаци за „зголемено движење на институционални пари во оваа класа на средства“, изјави за ТВ „Блумберг“ Керолин Боулер, извршна директорка на криптоплатформата „БТЦ маркетс“.
Еуфоријата околу ЕТФ фондовите поттикна заживување на биткоинот минатата година, при што монетата накратко надмина 49.000 долари дента кога почнаа да се тргуваат средствата. Потоа следуваа повеќедневна распродажба и пад на цената од 10.000 долари, додека инвеститорите резервираа профит и чекаа да видат како ќе поминат ЕТФ. Последователното отскокнување донесе предвид 50.000 долари како следно ниво на цени што треба да се освои, кое последен пат беше забележано во 2021 година.
Оптимизмот за четиригодишното преполовување на биткоинот, кое треба да се случи во април, се шири и низ криптосекторот. Преполовувањето го намалува количеството на биткоини што го добиваат рударите за работа со моќни компјутери, кои ги потврдуваат трансакциите на блокчејнот. Настанот генерално се смета за поддршка на цената на биткоинот, врз основа на минатите искуства.
Освен влијанието на приливите во ЕТФ, треба да се каже дека расположението кон биткоинот е „типично позитивно“ за време на новогодишните празници, кои моментално се во тек во Азија.
.webp){kind=icon}
