САД бараат три години затвор за поранешниот шеф на „Бајненс“

Американското Министерство за правда препорача 36-месечна затворска казна за Чангпенг Жао, поранешен извршен директор на „Бајненс“ (Binance), најголемата светска крипто-берза.

Казната „не само што ќе испрати порака до Жао, туку и до светот“, напиша Министерството во судски поднесок во вторникот, додавајќи дека цената за прекршување на американскиот закон „мора да биде значајна во смисла на ефективно казнување на Жао за неговите злосторства со цел одвраќање на други да го сторат тоа“.

Кон крајот на минатата година, „Бајненс“ призна вина за кршење на американските санкции и на мерките за спречување на перење пари, согласувајќи се на парична казна од 4,3 милијарди долари и надзор од страна на регулаторните тела. Жао, исто така, се изјасни за виновен и се повлече од функцијата извршен директор.

Тригодишната казна за Жао, кој е и ко-основач на „Бајненс“, би била двојно поголема од она што се очекуваше претходно.

Случајот на Жао е втора голема пресуда оваа година за извршен директор од криптосферата во американските судови.

Обвинителите во случајот против поранешниот шеф на FTX, Сем Банкмен-Фрид, првично бараа казна до 50 години за неговата улога во колапсот на берзата во 2022 година. Сепак Банкмен-Фрид на крајот беше осуден на 25 години затвор во март.

„Бајненс“ вети дека ќе направи неколку промени во својата структура и транспарентност по случајот во САД, вклучително и формирање на глобално седиште за компанијата. Берзата ја доби долгоочекуваната целосна регистрација на своите услуги во Дубаи претходно овој месец, откако Жао се согласи да се откаже од контролата на гласањето во локалниот ентитет.