Хакери го нападнаа екосистемот Солана (Solana) рано во средата при што погодени се илјадници крипто-паричници што е најнов удар на пазарот за крипто, откако Номад (Nomad) беше нападнат на почетокот на неделата.
Додека вкупната вредност на украдените средства засега е нејасна, четири адреси на паричници од Solana „исцедиле“ приближно 8 милиони долари од жртвите, според безбедносната фирма „Пекшилд“ (PeckShield). Се чини дека се погодени повеќе од 7.000 паричници, при што безбедносниот инцидент ги испразнил од SOL токени и USDC стејблкоини, посочи главниот извршен директор на „Бајненс“ (Binance), Чангпенг Жао на „Твитер“.
Токенот SOL на Solana падна за 7,3 отсто на 38,4 долари на почетокот на тргувањето во средата, што е најниска цена за една недела. Биткоинот беше малку променет, околу 23.000 долари.
„Многу останува непознато во овој момент, освен дека хардверските паричници не се погодени“, посочи портпаролот на Solana, Остин Федера.
Крипто-проектите се покажаа како значајна цел за хакерите и индустријата претрпе бројни напади годинава. Неволјите на Solana доаѓаат неколку дена откако Nomad, бриџ протокол за пренос на крипто токени преку различни блокчејнови, загуби близу 200 милиони долари поради безбедносна експлоатација во понеделникот. Повеќе од милијарда долари веќе се украдени од вакви платформи во 2022 година, според извештајот од јуни на форензичката фирма „Елиптик“ (Еlliptic).
„Иако постојат шпекулации дека инцидентот бил напад на синџирот на снабдување, природата на експлоатацијата останува нејасна“, рече Федера. Напади на синџирот на снабдување се случуваат кога се инфилтрира надворешна страна или провајдер со пристап до системите и податоците на жртвата.
.webp){kind=icon}
