Пропаднатата криптоберза на Банкмен-Фрид доби одобрение да ги исплати клиентите

Криптоберзата FTX доби судско одобрение целосно да ги исплати клиентите чии дигитални средства беа блокирани на платформата кога таа колабира пред речиси две години, што е невообичаен резултат, кој би можел на акционерите во измамничката берза на Сем Банкмен-Фрид  да им донесе дел од милијарда долари во запленети средства.

Американскиот судија за стечајни постапки Џон Дорси во понеделникот изјави дека ќе ги одобри исплатите на клиентите на FTX оштетени од Банкмен-Фрид според сеопфатен предлог формулиран од советниците што ја презедоа контролата врз берзата по нејзиниот колапс. Во ноември 2022 година цените на криптовалутите беа толку ниски и FTX беше во таков хаос што советниците првично заклучија дека доверителите ќе вратат само дел од она што им се должи.

Но перспективите за клиентите значително се подобрија за време на стечајот. Во јуни компанијата имаше 12,6 милијарди долари, сума што би можела да се зголеми дури на 16,5 милијарди долари откако FTX ќе ги пронајде и продаде сите средства на платформата, според судските документи. Продадените средства вклучуваат различни проекти за ризичен капитал, како уделот на FTX во компанијата за вештачка интелигенција „Антропик“ (Anthropic).

„Секако дека имавме корист од биковскиот криптопазар во последната година“, изјави адвокатот на доверителите Кен Пасквале пред судијата што го надгледува случајот на несолвентност. „Компанијата успеа да ја искористи таа ситуација со склучување договори со доверителите, владините регулатори и други“, рече Пасквале.

Пресвртот беше толку значителен што и преференцијалните акционери на FTX би можеле да добијат пари назад. Исплатите на акционерите би доаѓале од дел од средствата запленети од федералната влада, приходи што вклучуваат околу 626 милиони долари генерирани од продажбата на акциите на „Робинхуд“ (Robinhood Inc.), претходно во сопственост на Банкмен-Фрид и на соосновачот на FTX, Гери Ванг. Таквите исплати се ретки во поглавјето 11, каде што акционерите обично се избришани.

Меѓу фирмите што поседуваат преференцијални акции се „Кањон“ (Canyon Partners), „Трајб капитал“ (Tribe Capital Management) и „Стидвју“ (Steadview Capital Management), според извештај поднесен во неделата во стечајниот суд. „Кањон“ е исто така еден од најголемите сопственици на побарувања од клиенти на FTX, поседувајќи повеќе од 600 милиони долари во такви побарувања, според судските документи.

Bloomberg

Сепак, некои клиенти на FTX го критикуваа планот бидејќи за разлика од другите стечајни платформи, исплатите се вршат во готовина наместо во криптовалути, што значи дека ќе пропуштат целосно да ја искористат вредноста на дигиталните средства од моментот на колапсот на фирмата. Се очекува клиентите да не добијат ништо за корисничкиот токен на FTX, FTT.

Биковски пазар 

Во последно време имаше само неколку големи корпоративни стечаи во САД каде што доверителите ги добија сите свои пари назад. Во 2021 година компанијата за изнајмување автомобили „Херц“ (Hertz Global Holdings) излезе од стечај со пари останати за исплата на акционерите, по силниот пораст на цените на користените автомобили.

Иако сите долгови ќе бидат исплатени целосно, плус камата, ништо нема да остане за сопствениците на капитал освен ако федералните обвинители не се согласат да ги споделат милијардата долари што ги заплениле, изјави адвокатот за стечај на FTX, Ендру Дитдерих, во понеделникот на суд. Според договорот со FTX, акционерите би можеле да добијат 18 отсто од сите вратени запленети средства до 230 милиони долари, покажува судски поднесок од септември.

Адвокатите на FTX во понеделникот изјавија дека договор со Министерството за правда за потенцијалното враќање на запленетите средства не е постигнат и можно е преференцијалните акционери да не добијат никаква распределба според планот.

Во меѓувреме, закрепнувањето на клиентите доби огромен поттик од зајакнувањето на криптовалутите, што предизвика цената на биткоинот да се зголеми речиси четирикратно од крајот на 2022 година.

Одлуката за исплата во готовина се базира на фактот дека FTX поседуваше значително помалку криптовалути отколку што клиентите беа наведени да веруваат, изјавија адвокатите за време на судското рочиште во понеделникот. Наместо тоа, извршниот директор на FTX, Џон Џ. Реј III, ги продаде дигиталните средства што ги поседуваше FTX, како солана (Solana), токен силно поврзан со Банкмен-Фрид.

Советниците за стечај на фирмата ја ангажираа „Галакси диџитал“ (Galaxy Digital Capital Management LP) за да ги продаде и заштити преостанатите дигитални средства на FTX. Касите на FTX се пополнија по аранжманот, придонесувајќи за исплата на клиентите со камата.

Исплатите на клиентите нема да се случат веднаш. Пред да почнат клиентите да добиваат исплати, FTX мора да формира фонд и да ангажира фирма што ќе го надгледува процесот на распределба на парите.

FTX поднесе барање за стечај во ноември 2022 година откако Банкмен-Фрид ја затвори платформата за тргување со криптовалути на компанијата и им ја предаде контролата на експерти за несолвентност. Подоцна Банкмен-Фрид беше осуден за измама на 25 години затвор.

Во моментов нема коментари за веста. Биди прв да коментира...

Остави коментар