Трамп веќе на големо заработува од крипто

Викендот пред доаѓањето на Доналд Трамп во Белата куќа возбудата за промена на власта ја почувствува индустријата за криптовалути.

На крипто гала-настанот во петокот вечер, сите влијателни личности од областа на криптоиндустријата се собраа во Вашингтон за да ги прослават промената на власта и попријателскиот однос на новата администрација кон оваа индустрија.

Престижниот настан, на кој можеше да се оди само со покана, беше задолжително дружење за сите што нешто значат, пишуваа влијателните личности. На социјалните мрежи се појавија фотографии од дружењето на влијателните личности од криптоиндустријата со политичари и ѕвезди.

„Владеењето на теророт над криптовалутите е завршено“, рече Дејвид Сакс, директор на фонд за ризичен капитал, кој беше именуван за „криптоцар“ на Трамп, известува „Блумберг“.

Одговорот на прашањето колку претседателот може да биде наклонет кон криптовалутите дојде истата вечер, бидејќи Трамп во петокот го лансира својот мемекоин $Trump - виртуелен токен, од кој, како што изгледа, добро ќе заработат членовите на семејството и тесниот круг на луѓе од доверба на новоизбраниот претседател.

На Доналд Трамп му се придружи и Меланија

Пазарната вредност на токенот до саботата попладне се искачи на околу 5,6 милијарди долари, а моментално изнесува 11 милијарди долари – цената од почетокот на тргувањето порасна за повеќе од 800 проценти. Цената на мемекоинот на Трамп моментално изнесува околу 58 долари.

Ова би можело за субјектите поврзани со Трамп, кои поседуваат поголем дел од токените, барем на хартија да значи неочекуван приход од неколку милијарди долари, пишува „Блумберг“. „$Trump е моментално најпопуларниот дигитален мем во светот“, напиша синот Ерик Трамп на мрежата X. „Само што почнавме!“

Во неделата својот токен $Melania го лансира и Меланија Трамп. Неговата пазарна капитализација моментално изнесува 1,9 милијарда долари. Цената на нејзиниот токен моментално изнесува околу 11 долари, покажуваат податоците на веб-страницата „Коинмаркеткеп“ (Coinmarcetcap).

Според критичарите, продажбата на токените на Трамп претставува најнова повреда на етичките норми и нова злоупотреба на положбата за стекнување лична финансиска корист.

Таков мемекоин, кој обично не е поврзан со никаква основна дејност и затоа е многу шпекулативен за инвеститорите и потенцијално многу профитабилен за основачите, уште повеќе ги поместува границите на етички спорното однесување, изјави за „Блумберг“ Даниел Брајан, извршен директор на проектот ПГО (Project on Government Oversight).

Со купувањето можете да добиете „дел од историјата“ 

Со мемекоините, семејството Трамп уште повеќе се вклучува во индустријата што ќе ја регулира неговата администрација, пишува „Блумберг“.

Веб-страницата на токенот, која е означена како „единствениот официјален мемекоин на Трамп“, ги поттикнува купувачите да „добијат свој дел од историјата“, а на неа има слики од Трамп, кој пркосно ја крева тупаницата, како што направи откако во јули на митингот едвај го преживеа обидот за атентат.

Осумдесет отсто од виртуелниот имот е во сопственост на подружницата на организацијата на Трамп, наречена „ЦИЦ дигитал“ (CIC Digital), и поврзаниот субјект наречен „Фајт фајт фајт“ (Fight Fight Fight) - чие име ги сумира зборовите што ги изговори Трамп откако куршумот му ја промаши главата и го погоди во увото.

Нивните удели ќе бидат отклучени во период од три години. Според веб-страницата, веднаш беа достапни 200 милиони токени, а понудата ќе се зголеми на една милијарда во рок од три години. Трамп и неговите синови Доналд Трамп Помладиот и Ерик Трамп ја промовираат и платформата за криптовалути наречена ВЛФ (World Liberty Financial), во која имаат и финансиски врски.

Индустријата за криптовалути го поддржа изборот на Доналд Трамп, бидејќи администрацијата во заминување на Џо Бајден беше многу рестриктивна кон неа.

Во моментов нема коментари за веста. Биди прв да коментира...

Остави коментар