Затвореникот Банкмен-Фрид со многу критики за Бајден и пофалби за Трамп

Сем Банкмен-Фрид во поткастот на поранешниот новинар на „Фокс“ (Fox News), Такер Карлсон, силно ги критикуваше поранешниот американски претседател Џо Бајден и челникот на Комисијата за хартии од вредност и берза Гери Генслер. Истовремено, неговите родители бараат помилување за својот син од актуелниот претседател Доналд Трамп.

Банкман-Фрид издржува 25-годишна затворска казна поради улогата што ја имаше во колапсот на криптоберзата FTX. Во поткастот тој рече дека првите две години од мандатот на Бајден го „шокирале“ и додаде дека регулацијата на криптопазарот под Генслер била „кошмар“. Од друга страна, Банкмен-Фрид рече дека е оптимист поради пораките на Доналд Трамп.

„Секако, важно е пораките да се спроведат во дела и моментално сме на таа точка“, рече 33-годишниот Банкмен-Фрид. „Промената на луѓето помага, но финансиските регулаторни тела се огромни бирократии во федералната влада. Тие не се навикнати да се менуваат прекуноќ“.

Ова е второ интервју што поранешниот криптомилијардер го даде на некој конзервативен медиум од затворот во Бруклин откако „Блумберг“ (Bloomberg) во јануари извести дека неговите родители бараат помилување од претседателот Трамп. Во 40-минутниот разговор со Карлсон, тој се осврна на низа теми, од односите со Шон Диди Комбс, кој е во истиот затвор („добар“ е кон него и другите затвореници), до раскажување што точно разменува за потреби во затворот (мафини).

Портпаролот на Банкмен-Фрид, Марк Ботник, рече дека поднел оставка во четвртокот, откако го видел интервјуто на X. Од Управата за затвори не одговориле веднаш на барањата за коментар.

Карлсон го прашуваше својот гостин неколкупати за политичарите од Демократската партија на кои Банкман-Фрид им донирал милиони. Поранешниот милијардер рече дека не сакал да контактира со нив по имплозијата на FTX кон крајот на 2022 година, бидејќи, како што рече, не сакал да направи ништо „непримерно“. Исто така, рече дека почнал да им донира и на политичарите од Републиканската партија бидејќи бил „навистина, навистина шокиран“ од она што го видел за време на мандатот на Бајден.

„Кон крајот на 2022 година приватно им донирав на републиканците исто колку и на демократите“, рече тој. „Тоа се дозна токму во периодот на пропаста на FTX. Веројатно и тоа одигра улога“.

Своето време во затворот го опиша како „многу дистописко“, но додаде дека времето го минува читајќи романи и играјќи шах. Тој вели дека некои од најнасилните осуденици во затворот станале исклучително добри во шах без оглед на слабото образование и дека „постојано“ губи од нив.

„Не го очекував тоа“, рече тој.

Тој додаде дека многу време троши на „размислување за тоа како да комуницира“ и дека не бил ефикасен комуникатор во моментот на кризата на својата криптоберза, нагласувајќи дека често „се губи во деталите“ и заборава како „да ја прикаже пошироката слика“.

Иако рече дека пропаста на FTX била „гигантска катастрофа“ и дека „во животот најмногу жали“ што не ја спречил, додаде дека не мисли дека е криминалец.

„Очигледно дека државното обвинителство мисли дека можеби сепак сум“, заклучи тој.