Биткоинот расте додека САД се обидуваат да ги олеснат трговијата и тензиите околу Фед

Биткоинот продолжи да расте откако американскиот претседател Доналд Трамп рече дека нема намера да го отпушти претседателот на Федералните резерви (Фед) Џером Пауел, намалувајќи ја на тој начин загриженоста за автономијата на централната банка.

Утрово на Лондонската берза најголемата криптовалута порасна за околу три проценти пред да намали дел од добивките на 93.804 долари. Пораснаа и помалите токени, вклучувајќи ги етерот, XRP и соланата.

Bloomberg Mercury

 

Вчера биткоинот надмина 90.000 долари како знак дека се ослободува од долгогодишната тенденција да се движи во иста насока како и американските акции. Но токенот потоа порасна во согласност со акциите и доларот по коментарите на Трамп за Пауел и во услови на оптимизам дека трговските тензии можеби се намалуваат.

Министерот за финансии Скот Бесент на самитот на инвеститорите зад затворени врати во вторникот изјави дека и двете страни не можат да го поднесат царинскиот застој со Кина и дека двете најголеми економии во светот мора да пронајдат начин за деескалација на проблемот.

Американските фондови со кои се тргува на берза со биткоини вчера заработија вкупно 936 милиони долари, што е трет највисок прилив за групата годинава.

Уште еден поттик за криптото дојде во форма на извештај дека „Кантор Фицџералд“ (Cantor Fitzgerald LP), „Тетер холдингс“ (Tether Holdings Ltd.) и „Софтбанк“ (SoftBank Group) се во преговори за формирање нова компанија вредна три милијарди долари, што ќе апсорбира дополнителни милијарди долари во криптовалути.

Но порастот на криптовалутите може да се упати кон корекција до крајот на неделата, рече Стефан фон Хениш, директор за вонберзанско тргување во азиско-пацифичката компанија „Битго“ (Bitgo Inc). „Пазарот немилосрдно закрепнуваше и овде малку подзастана“, рече тој, додавајќи дека корекција до 88.000 долари за биткоинот „не би била неочекувана“.

Инаку, во моментот на пишувањето на текстот биткоинот се тргува по цена од нешто над 93.500 долари.

„Кју-ар капитал“ (QR Capital), бразилска фирма што управува со криптосредства, во својот извештај посочи дека забележале „остар пад на обемот на спот тргувањето на централизираните берзи, со поместување на ликвидноста кон пазарот на фјучерси“.

„Тоа сугерира дека инвеститорите бараат потпора за поагресивни позиции во крипто“, се додава. „Иако ова означува доверба, исто така го зголемува ризикот од остри корективни потези: вишокот на позиции со потпора може да предизвика каскадни ликвидации доколку дојде до ненадеен пресврт во расположението на пазарот“.