Семејството на Трамп има проекти низ целиот криптосектор

Претседателот Доналд Трамп и неговото семејство покажаа интерес речиси за секој агол на криптоиндустријата.

Постојат незаменливи токени (НФТ) и дигитални колекционерски предмети; проект за децентрализирани финансии; предложен стабилен коин; обид за рударење биткоин; и пар мемекоини, еден за претседателот и еден за првата дама, Меланија Трамп.

Земени заедно, различните проекти се приближуваат до милијарда долари во добивки дури и по пресметувањето на најновиот круг на пазарни флуктуации предизвикани од трговската војна, според пресметките на „Блумберг“ (Bloomberg) базирани на јавно достапни податоци.

Доналд Трамп веќе е најбогатиот човек што некогаш станал претседател на САД, а неговите инвестиции надвор од криптосферата вклучуваат значајни вложувања во недвижности. По неговиот прв избор во 2016 година, адвокатите на Трамп создадоа фонд за управување со неговите деловни работи. Тој беше управуван од неговите двајца најстари синови и од Ален Вајселберг, долгогодишниот главен финансиски директор на компанијата за недвижности на Трамп.

Ерик Трамп нагласи дека „нема конфликти“ поврзани со криптоинвестициите на семејството.

„Јас не работам со Белата куќа“, рече Ерик Трамп за време на интервју за „Блумберг“ во април. „Ние веруваме во криптото долго време“.

Јавната наклонетост на претседателот кон криптото е сè уште релативно нова. Трамп го нарече биткоинот „измама“ уште во 2021 година, велејќи дека не му се допаѓа токенот „бидејќи е друга валута што се натпреварува против доларот“ и дека треба да биде регулиран „многу, многу строго“.

Односот на Трамп кон индустријата за дигитални средства потоа значително се разви. Како кандидат, тој се обраќаше и имаше полза од значајни донации во неговата кампања за реизбор од криптобизнисмени и поддржувачи на секторот.

Во вториот мандат Трамп потпиша извршни наредби како поткрепа на неговото ветување дека ќе ги направи САД криптопрестолнина на планетата, назначувајќи ги Дејвид Сакс и Бо Хајнс да ги претставуваат интересите на индустријата, и продолжи да го промовира својот мемекоин со објави на социјалната мрежа Трут (Truth Social).

„Трамп и неговото семејство изгледаат желни да воспостават широко упориште во секторот пред натамошните регулаторни акции, кои веројатно ќе ја зголемат вредноста на криптосредствата“, рече Есвар Прасад, професор по трговска политика на универзитетот „Корнел“.

Еве како се развиваше криптопортфолиото на Трамп.

Незаменливи токени (НФТ): декември 2022 

Трамп се насочи кон криптото по вљубувањето во своите дигитални колекционерски предмети, познати како незаменливи токени.

Бил Занкер, пријател на Трамп и основач на компанијата за образование за возрасни ЛА (The Learning Annex), првично му ја предложил идејата. Оттогаш, ТТЦН (Trump Trading Cards NFTs), кои го прикажуваат во различни пози и облеки (понекогаш облечен како суперхерој), се распоредени во четири колекции.

Претседателот минатата година организира вечери за обожавателите што ги купуваа неговите НФТ, кои, според финансиските откритија, донеле милиони долари.

Децентрализирани финансии: септември 2024 

Семејството Трамп го најави својот криптопроект ВЛФ (World Liberty Financial) пред изборите во САД. Од неговото основање, проектот купува криптовалути во вредност од милиони долари, вклучувајќи етер и трон, иако сè уште не ги нуди ветените услуги на децентрализирани финансии (DeFi) како позајмување крипто без посредници.

Компанија поврзана со Трамп добива 75 отсто од нето-приходот како такса, вклучувајќи ги и приходите од продажба на токени, според објавените документи. Семејството Трамп поседува 60 отсто од капиталниот удел на ВЛФ преку нивната компанија „ДТ Маркс“ (DT Marks DeFi LLC).

Криптопроектот на Трамп

Како претседателот, неговото семејство и пријатели се поврзани во ВЛФ Bloomberg

Компанијата собра 550 милиони долари од продажба на токени по завршувањето на вториот круг минатиот месец.

Зак Виткоф, еден од коосновачите на ВЛФ, е син на Стив Виткоф, кој помогна да се поврзе семејството на претседателот со другите учесници во криптопроектот. Со продажбата на токени на платформата во октомври, набљудувачите поставија прашања за потенцијалниот конфликт на интереси за семејството Трамп, со оглед на влијанието на администрацијата врз регулативите.

Синовите на Трамп, Доналд Џуниор, Ерик и Барон, се наведени како советници за Веб 3 (Web3) на ВЛФ. Семејството активно го промовира проектот преку социјалните мрежи и јавни настапи.

Мемекоини: јануари 2025 

Денот пред инаугурацијата, Трампи неговата сопруга Меланија ги лансираа своите мемекоини, високошпекулативен агол на криптосферата во кој активата нема многу внатрешна вредност. По почетниот пораст, кој веројатно генерираше повеќе од 11,4 милиони долари во такси за субјекти поврзани со претседателот само во јануари, цените паднаа.

Овој потфат беше пречекан со мешана реакција од криптоиндустријата, бидејќи многумина веруваа дека го нарушува напорот да се претстави како полегитимна. Два субјекта поврзани со Трамп - ЦИЦ (CIC Digital) и ФФФ (Fight Fight Fight LLC) - поседуваат 80 отсто од понудата, држење што ќе се отклучи во текот на три години.

ЕТФ: февруари 2025 

„Трамп медија“ (Trump Media & Technology Group Corp.) на почетокот на февруари соопшти дека аплицирала за трговска марка за инвестициски производи со теми што ги следат приоритетите на Трамп, вклучувајќи ЕТФ (Truth.Fi Bitcoin Plus ETF).

Беше наведена соработка со „Крипто.ком“ (Crypto.com) за лансирање ЕТФ. Месецот пред победата на Трамп на изборите, Комисијата за хартии од вредност поднесе известување дека има намера да го тужи „Крипто.ком“ за работење на нерегистрирана берза на хартии од вредност. Според компанијата, истрагата беше затворена во март.

Стабилен коин: 25 март 

ВЛФ објави планови за лансирање на свој стабилен коин што го следи доларот наречен УСД1 (USD1), кој првично ќе се креира на блокчејните етереум и бајненс смарт чејн. Токенот ќе биде поддржан еден на еден од краткорочни американски државни обврзници, доларски депозити и други парични еквиваленти, според ВЛФ.

Овој потег дојде непосредно пред историската легислатива за стабилни коини, која прогресираше преку Комитетот за финансиски услуги на Претставничкиот дом, додека криптокомпании ги промовираат стабилните коини како начин за намалување на глобалните финансиски трансакции.

Биткоин-рударење: 31 март 

Семејството Трамп посочи дека планира да лансира потфат фокусиран на рударење биткоин во соработка со „Хат 8“ (Hut 8 Corp). Рударите на биткоини беа рани поддржувачи на кампањата за реизбор на Трамп. Во јуни 2024 година, тогашниот кандидат Трамп собра неколку извршни директори за рударење во Мар-а-Лаго, кажувајќи им дека ќе биде нивен застапник во Белата куќа.

Секторот за рударење биткоин во САД се претвори во индустрија вредна милијарди долари.

„Инвестирањето во крипто повеќе не е едноставно како да се држи биткоин“, рече Кембел Харви, професор по финансии на универзитетот „Дјук“. „Има многу различни криптосегменти. Трамп има присуство во заемите, иден стабилен коин, други криптосредства, а сега и во рударски операции“.