Пад на криптовалутите поради скептицизам за државните резерви на Трамп

Еуфоријата на пазарите на дигитални средства предизвикана од плановите на Доналд Трамп за стратегиски крипторезерви се претвори во скептицизам во понеделникот, предизвикувајќи рани загуби кај криптовалутите, кои се влошија во текот на денот додека инвеститорите се подготвуваа САД да наметнат царини од 25 отсто за Мексико и за Канада.

Трамп во неделата на социјалната мрежа Трут (Truth Social) наведе дека токените XRP, солана (SOL) и кардано (ADA) ќе бидат вклучени во резервите, заедно со биткоин и етер. Веста предизвика непосреден криптораст, нудејќи олеснување за класата на средства што штотуку го имаше најлошиот месец од 2022 година. Сепак, вклучувањето на трите помалку познати дигитални токени подоцна беше пречекано со прашања од инвеститорите за вредноста на проектот.

Сите криптовалути што Трамп рече дека ќе бидат вклучени во резервите забележаа остар пад до доцна попладнето во Њујорк, во услови на широко повлекување на ризичните средства, кое го повлече индексот Nasdaq 100 надолу за повеќе од два отсто. Повеќето од добивките од неделата беа избришани.

 

 

Индексот Bloomberg Galaxy Crypto падна за речиси 28 отсто во февруари. Падот изврши притисок врз Трамп, кој се врати во Белата куќа откако индустријата го облеа со донации за кампањата и со пофалби. Дури и одвраќањето на Комисијата за хартии од вредност и берзи од долгогодишната репресија не успеа да го запре падот, кој многумина им го припишуваат на нервозата околу трговските царини на Трамп и драматичните потези за намалување на владините програми.

„За претседател што се води од тоа да биде херој на пазарот, минатонеделното изведување на ризичните средства беше сè освен инспиративно“, посочија од КЦП (QCP Capital) во белешка во понеделникот. „Политичката калкулација е јасна - на Трамп му требаше победа пред неговите рејтинзи на одобрување да почнат да паѓаат, метрика што веројатно ја зеде многу лично“.

Биткоинот беше речиси за девет отсто понизок до 15.20 часот во Њујорк, тргувајќи на околу 86.000 долари, додека етерот изгуби околу 16 отсто. XRP падна за 18 отсто по растот од 32 отсто во неделата, додека SOL и ADA паднаа за околу 19 отсто секој. Цените на криптовалутите паднаа до нивните најниски нивоа на денот откако Трамп во Белата куќа рече дека нема „простор за Мексико или Канада“ да преговараат со САД за да добијат ослободување од царините од 25 отсто, кои треба да стапат во сила денеска.

Во своето прво соопштение за создавање крипторезерва во јануари, Белата куќа посочи дека таквата резерва би можела да биде „потенцијално добиена од криптовалути законски запленети од страна на федералната влада преку нејзините напори за спроведување на законот“. Биткоинот обично е главниот криптотокен запленет од агенциите за спроведување на законот, вклучувајќи го и разбивањето на озлогласениот веб-сајт „Силк роуд“ (Silk Road).

Првичното соопштение содржеше малку детали за тоа како ќе се создаде резервата, разочарувајќи ги инвеститорите и помагајќи да се постави сцената за февруарскиот пад.

Неделните објави на Трамп дојдоа токму кога неговиот „криптоцар“ Дејвид Сакс се подготвува да го одржи првиот индустриски самит на Белата куќа. Во понеделникот,Сакс се обрати на платформата X за да објави дека ги продал сите свои криптовалути - вклучувајќи биткоин, етер и солана —- пред администрацијата на Трамп да настапи во јануари.

XRP е криптовалутата поврзана со „Рипл“ (Ripple Labs Inc.), компанијата управувана од Бред Гарлингхаус. SOL и ADA се матични токени на блокчејните Солана и Кардано. Подолу е резиме на историјата на токените и луѓето со кои се поврзани.

XRP 

Трамп во февруари сподели приказна од „Коиндеск“ (CoinDesk) за Гарлингхаус на Трут (Truth Social), предизвикувајќи аплаузи од обожавателите на XRP - матичниот токен на „Рипл“ - и негодување меѓу другите криптоизвршители.

Гарлингхаус во декември рече дека компанијата планира да донира XRP во вредност од пет милиони долари за инаугуративните свечености на Трамп. Тој и главниот правен службеник на „Рипл“, Сту Алдероти, беа фотографирани како вечераат со претседателот во Мар-а-Лаго.

Тоа ниво на политички пристап претставува остар пресврт на судбината за компанијата со седиште во Сан Франциско, која беше тужена во 2020 година од страна на КХВ и обвинета за понуда на нерегистрирани хартии од вредност. Американскиот окружен суд подоцна утврди дека XRP е хартија од вредност кога им се продава на институционални инвеститори, но не и кога им се продава на малопродажни инвеститори, што беше видено како победа во криптоиндустријата. КХВ ја обжали таа одлука. Иако КХФ отфрли многу акции поврзани со криптото, жалбата за „Рипл“ сè уште не е повлечена.

 

 

Основана во 2012 година и првично наречена „Опенкоин“ (Opencoin), „Рипл“ беше една од првите компании што почнаа да развиваат технологија за дистрибуирани книги за главните финансиски услуги. Таа создаде своја платформа за да го забрза и намали трошокот за решавање на меѓународните плаќања.

Како и многу други стартапи за блокчејн што целат на традиционални финансиски услуги, имаше мешани резултати, додека банките бавно ја прифаќаат технологијата.

Солана

Солана е блокчејн што го избираат издавачите на таканаречени мемекоини, дигитални средства со мала внатрешна вредност, кои сепак може да пораснат во вредност ако успеат да го привлечат вниманието на корисниците на социјалните мрежи - и кои може и да се распаднат исто толку брзо.

Трамп и неговата сопруга Меланија лансираа мемекоини на Солана во јануари. Токенот на претседателот е намален за околу 80 отсто од неговото највисоко ниво од околу 74 долари, според податоците на „Коин геко“. Во февруари претседателот на Аргентина, Хавиер Милеј, се најде во политички скандал откако во објава на X ги насочи своите следбеници кон мемекоин базиран на Солана наречен либра.

Лансиран во 2020 година, Солана некогаш беше тесно поврзан со сега затворениот претприемач Сем Банкмен-Фрид и неговата трговска фирма „Аламеда“ (Alameda Research). Цената на SOL, матичниот токен, падна остро по колапсот на криптоимперијата на Банкмен-Фрид во ноември 2022 година.

Потоа закрепна во 2024 година, пред да достигне највисоко ниво од 295 долари на 19 јануари - истиот викенд кога Трамп го претстави својот мемекоин. Токенот оттогаш се повлече за 45 отсто и се тргува за околу 160 долари.

Кардано

Кардано, кој се позиционира како ривал на Етереум, беше лансиран во 2017 година по собирање на над 60 милиони долари преку продажба на своите токени, според записите на „Коин геко“. За разлика од Етереум, кој се смета за главниот комерцијален автопат на блокчејн-индустријата, Кардано се мачи да заземе значителен пазарен удел во децентрализираните финансиски пазари, кои се потпираат на автоматизиран софтвер наместо на луѓе за извршување функции.

Чарлс Хоскинсон, коосновач и извршен директор на компанијата зад блокчејнот Кардано, во поткаст објавен на X кратко по победата на Трамп во ноември рече дека им помагал на американските законодавци да ја обликуваат криптополитиката.

Вкупната вредност на средствата заклучени на Кардано моментално изнесува 607 милиони долари, во споредба со околу 90 милијарди на Етереум, според податоците на „Дефилама“ (DeFiLlama).

Во моментов нема коментари за веста. Биди прв да коментира...

Остави коментар