Трамп ќе биде домаќин на крипто самит следниот петок

Американскиот претседател Доналд Трамп ќе претседава со првиот самит за криптовалути, што ќе се одржи следниот петок во Белата куќа, дополнително истакнувајќи ја на тој начин својата посветеност за прифаќање на крипто индустријата.

„Трамп ќе ги каже своите забелешки на собирот, каде ќе присуствуваат истакнати основачи, извршни директори и инвеститори од крипто индустријата, како и членови на Работната група на претседателот за дигитални средства“, се вели во соопштението на Белата куќа, испратено доцна синоќа.

Самитот ќе го води ризичниот капиталист и крипто цар од Белата куќа, Дејвид Сакс, а ќе го модерира извршниот директор на работната група, Бо Хајнс, се вели во соопштението.

Бргу по преземањето на функцијата претседателот потпиша извршна наредба за создавање работна група, составена од претставници од клучните агенции, која ќе ја советува Белата куќа за политиката на дигитални средства и ќе прави проценки и контрола на создавањето залихи.

Во работната група се вклучени претставници од секторите за финансии и правда, како и Комисијата за хартии од вредност и Комисијата за тргување со фјучерси на стоки.

За време на претседателската кампања во 2024 година, Трамп, кој некогаш се потсмеваше на криптото карактеризирајќи го како „измама“, вети дека ќе ги поедностави регулативите, ќе избере пријателски настроени лица за да го надгледуваат секторот, ќе ја поддржи рамката за стабили токени и ќе воспостави залихи на биткоини. По неговиот избор, индустријата донираше милиони долари на неговиот инаугуративен одбор.

Иако тој досега не ги исполни сите тие ветувања, политиките на неговата администрација и самиот самит означуваат нагло отстапување од строгиот регулаторен пристап на администрацијата на Бајден по неуспехот на ФТХ (FTX), платформата за размена на дигитални средства, како и други скандали што ја следеа оваа индустрија во изминатиот период. Трамп дури и самиот влезе во бизнисот со криптовалути, воведувајќи мемекоин непосредно пред одново да ја преземе претседателската функција и поддржа проект во кој се вклучени неговите синови, наречен „Ворлд либерти фајненшл“ (World Liberty Financial).

„Администрацијата е посветена на обезбедување јасна регулаторна рамка, овозможување иновации и заштита на економската слобода“, се додава во соопштението од Белата куќа.