Биткоинот загуби скоро третина од рекордната вредност - кои се причините за падот?

Обидите да се дешифрира што точно ја поттикнува цената на биткоинот често се незгодни потфати со повеќе неутрализирачки катализатори во комбинација.

Се чини дека тоа е случај токму деновиве, бидејќи набљудувачите на пазарите се обидуваат да ги откријат причините за падот на вредноста на оригиналната криптовалута од дури 28 проценти од нејзиниот рекорд, постигнат на 20 јануари, денот кога поддржувачот на крипто Доналд Трамп беше инаугуриран за претседател на САД. Тогаш цената на биткоинот надмина 109.000 долари.

Следуваат најчесто наведуваните причини за пад:

Макроекономски грижи

Биткоинот не е единственото средство, чија вредност падна во последните недели. Американската берза, исто така, доживеа пад што го турна индексот Nasdaq 100 надолу и тоа за околу седум проценти од неговиот последен рекорд од 19 февруари. Биткоинот често се смета за „висока бета“ (коефициент бета: мерка за ризикот со кој се соочува инвеститорот што го поседува средството), што значи дека кога акциите се движат во една насока, најголемиот крипто токен често се движи уште повеќе во истата насока.

Падот на акциите и истовремениот раст на американските државни државни обврзници се припишуваат на загриженоста за потенцијалните економски ефекти од плановите на Трамп да воведе дополнителни царини за трговските партнери.

„Тоа може да се смета како одговор на макро стравувањата за царините на Трамп и геополитичката несигурност“, рече Керолин Боулер, главна извршна директорка на „Би-ти-си маркетс“ (BTC Markets), коментирајќи го неодамнешниот пад на цената на криптовалутата.

Месечна промена на цената на биткоинот Bloomberg Mercury

 

Најголемиот хакерски напад досега

Загубите што неделава ги одведоа биткоинот и втората по големина криптовалута, етерот, на повеќемесечни најниски нивоа се случија по хакирањето на берзата „Бајбит“ (Bybit) на 21 февруари. За нападот се обвинува севернокорејската група „Лазарус“ (Lazarus), а од берзата се извлекоа речиси 1,5 милијарди долари.

Не само што тоа беше најлошата кражба досега во историјата на криптовалутите, туку и ги шокираше учесниците на пазарот бидејќи беше насочена кон т.н. „ладен паричник“, кој инаку се сметаше за многу безбеден бидејќи вклучува хардвер што не е поврзан со интернет.

„Довербата се разниша по хакирањето на 1,5 милијарди долари, што е прилична сума пари“, рече Захер Ебтикар, коосновач на крипто фондот „Сплит капитал“ (Split Capital). „Сигурен сум дека постојат и луѓе кои едноставно велат: ‘Знаете што? Можеби ќе можам да почекам уште малку““, вели тој.

Одливи од ЕТФ

Има малку тавтологија вклучена при поврзување на тековите во и надвор од фондовите со кои се тргува со биткоини на берзите и цената на криптовалутата бидејќи и двете може да се случуваат од слични причини.

Сепак, има ефект на ехо во играта. Како што цената на биткоинот опаѓа, инвеститорите природно извлекуваат пари од ЕТФ-овите кои го следат средството. Потоа, кога тие одливи се евидентираат, сигналот што се испраќа од пазарот на ЕТФ може да предизвика крипто трговците да продаваат повеќе биткоини.

Падот на биткоинот во февруари кореспондира со најголемиот месечен нето-одлив од ЕТФ-овите откако тие беа лансирани во јануари 2024 година, со егзодус од околу 3,3 милијарди долари, според податоците собрани од „Блумберг“.

„Жешките пари што го бркаат биткоинот или кое било шпекулативно средство, истекуваат исто толку брзо колку што влегуваат кога цените почнуваат да паѓаат“, вели Мајкл Розен, главен инвестициски директор во „Анџелис инвестментс“ (Angeles Investments).

Движење на паричните текови во ЕТФ Bloomberg Mercury

 

„Cash and Carry“

Ебтикар, но и други рекоа дека веруваат дека отпуштањето на тоа што во крипто светот е познато како „кеш енд кери“ (анг: Cash and Carry – арбитражна стратегија која што го искористува погрешното одредување на цената меѓу средството и неговиот соодветен дериват. Клучот за профит од оваа стратегија е евентуална корекција на таа погрешна цена.), исто така одигра улога во распродажбата. Трговијата, која е слична на тоа што е познато како основна трговија на традиционалните пазари, е начин да се профитира од разликите во цените помеѓу спот и фјучерси на пазарите.

Ако цените на фјучерсите на пазарите се повисоки од промптните цени, трговецот може да продава фјучерси и да купува промптни биткоини, со што ќе профитира од разликата. Сепак, трговците со фјучерси остануваат дефанзивни, со ниски премии за фјучерсите на биткоинот. Годишните мартовски премии паднаа на 5,7 проценти, при што дневната премија за следниот месец падна на најниско ниво од јули минатата година, според извештајот на „К33 рисрч“ (K33 Research) од 25 февруари.

„Одливот на ЕТФ во САД беше воден главно од арбитражни играчи како хеџ-фондовите кои тргуваат преку фјучерси и/или опции“, рече Марк Конорс, основач и главен инвестициски стратег во „Риск дименжнс“ (Risk Dimensions). „Се разбира, тука се и директните продажби. Но, мнозинството е насочено кон профитабилните арбитражни можности што се зголемија во овој најнов пад“, вели тој.

Трамп

Цените на многу од средствата за кои инвеститорите веруваа дека ќе имаат корист од враќањето на Трамп во Белата куќа се намалија во последните недели. Биткоинот беше веројатно најдобрата „трговија на Трамп“, со оглед на тоа колку тој гласно ја поддржуваше индустријата во кампањата. Додека Комисијата за хартии од вредност отфрли многу тужби и истраги за крипто компаниите во првите неколку недели од владеењето на Трамп, напредокот во понатамошната поддршка е бавен, барем во очите на некои трговци.

За време на кампањата Трамп вети дека ќе создаде стратешки национални залихи на биткоин, почнувајќи со токените кои веќе ги има американската влада по запленувањето на имотите. Неговиот републикански сојузник, сенаторката Синтија Лумис од Вајоминг, се надоврза со предлог-закон со кој се бара од владата да купува за да изгради залиха до еден милион биткоини во текот на следните пет години. Сепак, оттогаш не се зборуваше многу за планот, а предлог-законот на Лумис не доби голема поддршка во Конгресот. Извршната наредба на Трамп за поддршка на индустријата повика на проучување на можностите за залихи на дигитални средства, неисполнувајќи го засега ветувањето за создавање резерви во биткоини.

„Тоа што го поттикна ова е недостатокот на позитивни вести за извршната власт што некои експерти ги очекуваа, како и бројките за инфлацијата во САД“, рече Пол Хауард, виш директор во Винсент (Wincent).

Лумис во петокот посочи дека напредокот на предлогот за резерви во биткоини веројатно ќе потрае подолго отколку што би сакале многу од приврзаниците за крипто. „Се обложувам дека ќе видите дека државата има стратешки резерви на биткоини“, рече таа.

Изгледите ниту таму не се сјајни: пратениците во Монтана, Северна Дакота, Јужна Дакота и Вајоминг во последните неколку недели гласаа против формирањето крипто резерви на државно ниво, наведувајќи ги како причини загриженоста за ризикот и нестабилноста на дигиталните средства.