Заработката во здравствениот сектор е на врвот на индексот S&P 500

Најголемите американски компании за јавна здравствена заштита ги надминаа другите индустрии во третиот квартал бидејќи поголемата употреба на нови и специјализирани лекови, континуираната побарувачка за лекови за слабеење и силните трендови на посети на болници ги зголемија заработките.

Меѓу 11-те индустриски категории на индексот S&P 500, компаниите за здравствена заштита остварија највисок процент на пораст на заработката во анализираниот период. Тоа беше и кварталот со најдобри резултати за индустријата во повеќе од четири години.

Bloomberg Mercury

 

Побарувачката за специјализирани лекови, како што се лековите за лечење рак, донесе силни резултати за фармацевтските дистрибутери меѓу кои „Мекесон“ (McKesson Corp.), „Сенкора“ (Cencora Inc.) и „Кардинал хелт“ (Cardinal Health Inc.), изјави во интервју вишиот аналитичар за здравствена заштита на УБС (UBS), Кевин Калиендо.

„Специјализираниот бизнис во првиот квартал беше во тренд над историските нивоа“, рече главниот финансиски директор на „Кардинал хелт“, Арон Алт, за време на состанокот за објава на заработката на компанијата на крајот на октомври. „Тоа беше силен учинок за нас, особено во нашите области на сила, автоимуни заболувања, урологија и онкологија.“

 

Одделно, побарувачката за понови терапии, вклучувајќи ги имунолошките лекови на компанијата „Абви“ (AbbVie Inc.) и лековите за воспаление на „Амџен“ (Amgen Inc.), исто така, ги зголемија заработките за големите фармацевтски компании. Надминувањето на резултатите на компанијата „Ели Лили“ (Eli Lilly & Co.) е резултат на побарувачката за лекови за слабеење и дијабетес.

Подобрените временски услови во споредба со минатогодишните нарушувања предизвикани од ураганот ја зголемија целокупната активност во здравствениот сектор бидејќи болниците, аптеките и давателите на услуги ги избегнаа затворањата што влијаеа на резултатите една година претходно, рече Калиендо.

Bloomberg Mercury

 

Компаниите за медицински помагала имаа корист од стабилниот обем на процедури, помали режиски трошоци и пониски од очекуваните тарифни трошоци, што им помогна да ги надминат очекувањата за заработка, рече во интервју аналитичарот за медицински помагала на „Блумберг интелиџенс“, Мет Хенриксон. 

Високи проценки

Сепак, некои акции паднаа по објавата на финансиските резултати бидејќи високите проценки оставија малку простор за грешка, рече Хенриксон. Акциите на „Страјкер“ (Stryker Corp.) паднаа поради загриженоста за слабоста во нејзината медицинско-хируршка единица. „Декском“ (Dexcom Inc.) падна поради проблеми поврзани со сензорите коишто ги зголемија трошоците за отпад, како и доцнењата во испораката на мониторите за гликоза до некои пациенти. Бизнисот со континуирано мониторирање на гликозата на „Декском“ оваа година се соочи со проблеми, вклучувајќи го и повлекувањето во јуни и предупредувачкото писмо од американската Управа за храна и лекови во март дека прекршила неколку правила за производство.

Гледајќи напред, фокусот ќе биде на тоа како фармацевтските компании реагираат сега, кога неизвесноста околу цените на лековите се намали, рече Калиендо. Со појасни правила во сила, фирмите може да бидат посигурни да ги зголемат цените надвор од САД или да ги зголемат инвестициите во истражување и развој, потег што би можел да ги зајакне дијагностичките лаборатории, производителите на уреди и фирмите за клинички истражувања кои го поддржуваат развојот на лекови.

Иако производителите на уреди досега го издржаа влијанието на царините, мерките стапија на сила дури во август. Остануваат прашањата за ефектот на царините за целата 2026 година, рече Хенриксон.