Цената на нафтата мирува додека мировниот договор за Украина добива на интензитет

Цената на нафтата се стабилизира откако претходниот ден заврши на најниско ниво во последниот месец, поттикната од знаци дека мировниот договор за Украина се ближи, развој што би можел да доведе до укинување на ограничувањата за рускиот суров нафтен извоз во момент кога се наѕира глобален вишок.

Суровата нафта брент се движеше околу 63 долари за барел, додека суровата нафта ВТИ беше над 58 долари.

Американскиот претседател Доналд Трамп изјави дека „остануваат само неколку точки на несогласување“ и испрати преговарачи на нови средби, додека шефот на кабинетот на украинскиот претседател оцени дека разговорите во Женева поставиле „солидна основа“.

Нафтата останува близу најниското ниво во еден месец
Инвеститорите ги мерат сигналите за напредок кон мировен договор меѓу Русија и Украина

Bloomberg

Голем дел од руската нафта и деривати е под силни западни санкции, при што американските ограничувања за двете најголеми компании стапија во сила минатата недела. Сепак, Кина, Индија и Турција се активни купувачи на поевтинетата руска сурова нафта, па затоа тешко е да се процени какво влијание врз глобалните цени би имало евентуалното укинување на ограничувањата.

Цената на нафтата опадна за повеќе од една петтина од средината на јуни, бидејќи Организацијата на земјите извознички на нафта и нивните сојузници (ОПЕК+) врати дел од количествата на пазарот, а и производителите надвор од групата ја зголемија понудата. Светската понуда на сурова нафта следната година ќе го надмине побарувањето за рекордни 4 милиони барели дневно, прогнозира Меѓународната енергетска агенција овој месец.

„Клучното прашање е дали прекинот на огнот навистина би значел и укинување на санкциите“, вели Хуанг Ванже, аналитичар во „Дади фјучрс“ (Dadi Futures Co.).

„Бидејќи договорот за прекин на огнот го водат САД, дури и во најоптимистичко сценарио најверојатно е токму САД први да дозволат купувачи како Индија повторно да набавуваат руска нафта – преку исклучоци или попуштено спроведување на санкциите.“

„Голдман Сакс“ (Goldman Sachs Group Inc.) проценува дека евентуален мировен договор би ја намалил цената за околу 5 долари по барел од нивната основна прогноза од 56 долари за следната година. Според аналитичарот Дан Струјвен, тоа би значело дека брентот во 2026 година би се движел околу 50 долари, изјави тој за „Блумберг ТВ“ (Bloomberg TV).

Во САД, пак, извештајот на Американскиот институт за нафта покажа дека националните резерви од сурова нафта минатата недела се намалиле за умерени 1,9 милион барели. Официјалните податоци ќе бидат објавени во текот на денешниот ден.