Што значи тековниот пад на биткоинот и како аналитичарите ја гледаат иднината

Биткоинот повторно падна, а притисокот, како што често се случува, брзо се прелеа на поширокиот криптосектор. Наглото влошување на расположението на пазарот доведе до поевтинување од над 20 отсто во однос на рекордот што изворната криптовалута го достигна пред еден месец, оставајќи ја на пресвртна точка, која би можела да го одреди следниот правец на движење на вредноста.

Дигиталната валута во вторникот првпат од јуни падна под психолошката граница од 100.000 долари и во еден момент вредеше помалку од 97.000, што претставуваше дневен пад од над седум отсто. Средата донесе делумно закрепнување, па биткоинот околу 11 часот ја задржуваше цената од приближно 101.000 долари. Од почетокот на годината досега биткоинот бележи раст понизок од 10 отсто, со што заостанува зад водечките светски акции и повторно ги разбуди сомнежите на некои набљудувачи во неговиот потенцијал да служи како заштита на инвеститорските портфолија.

Монетата во средата се движеше блиску до 50-неделниот едноставен подвижен просек, што се смета за клучно ниво, кое служеше како силна поддршка за време на речиси тригодишниот тренд на раст, поттикнувајќи биковски импулс и обновувајќи го потенцијалот за понатамошен пораст најмалку трипати од 2023 година, објави „Коиндеск“ (CoinDesk), укажувајќи на борбата на биткоинот да пронајде стабилна основа.

Движењето на втората највредна криптовалута, етерот, беше уште подрастично – по падот од 15 отсто во вторникот, тој во средата забави на околу шест отсто, со цена од 3.300 долари. Многу алткоини, меѓу кои XRP, BNB, солана и кардaно, забележаа слични загуби. Со најновиот бран на пад, поединечни помалку ликвидни токени изгубија повеќе од 50 отсто од вредноста од почетокот на годината.

„Падот на биткоинот до јунските минимуми ја одразува пазарната структура што и понатаму се бори со психолошкиот товар од октомврискиот бран на ликвидации, кој суштински го промени начинот на кој учесниците му пристапуваат на постојниот надолен тренд“, изјави Крис Њухаус, директор за истражување во компанијата „Ергонија“ (Ergonia), специјализирана за децентрализирани финансии, пренесе „Блумберг“.

Bloomberg

Да потсетиме, откако минатиот месец силен бран на ликвидации избриша милијарди долари од долгите позиции на криптопазарот, трговците покажуваат зголемена претпазливост. Отворениот интерес за биткоин-фјучерси и натаму е значително под нивото од пред колапсот, додека трговците со опции сè почесто вложуваат во продажни опции насочени кон нивото од 80.000 долари, покажуваат податоците на криптоберзата „Дерибит“ (Deribit).

Што е поинаку овој пат

Вториот извештај на „Блумберг“ укажува на фактот дека сегашниот пад е предводен од постојан бран на продажби на спот-пазарот, за разлика од синџирестите ликвидации што го предизвикаа октомврискиот колапс. Тоа значи промена во образецот на кој беа навикнати трговците со криптовалути, каде што наглите ценовни осцилации најчесто беа резултат на присилни ликвидации на пазарот на фјучерси. За појаснување, станува збор за автоматски продажби на позициите кога вредноста на инвестицијата паѓа до тој степен што трговецот не може да ги покрие загубите.

Долгогодишните сопственици на биткоини продале околу 400.000 монети во текот на изминатиот месец – одлив вреден околу 45 милијарди долари што го доведе пазарот во нерамнотежа, изјави Маркус Тилен, директор за истражување во компанијата „10-екс Рисрч“ (10x Research), 

Според процената на криптоаналитичарот и коосновач на „ЦТБ Крипто & консалтинг“ (CTB Crypto & Consulting), Иван Андрејевиќ, ова најверојатно не е знак на пад на довербата на инвеститорите во биткоинот, бидејќи „капиталот и понатаму пристигнува на пазарот, особено откако влегуваме во сè поголема регулација“, кој смета дека таа тенденција долгорочно ќе продолжи.

„Мојата претпоставка е дека биткоинот во моментов само ги менува сопствениците, а тоа е една од причините поради кои долгогодишните инвеститори продаваат. Имено, првите инвеститори препознаваат дека параболичната фаза многу веројатно е завршена.“

Истовремено, во последните часови се бележат одливи од одделни крипто ЕТФ-ови (exchange-traded funds – фондови со кои се тргува на берза) и растечка загриженост поради можни продажби од страна на компании што држат дигитален имот. Индексот на страв и алчност на „Коинмаркеткап“ (CoinMarketCap) за криптовалути се приближи до територијата на екстремен страв.

Bloomberg

Од друга страна, во вторникот, според податоците на аналитичката платформа „Коинглас“ (CoinGlass), биле ликвидирани околу две милијарди долари во криптопозиции – значително помалку во споредба со 19 милијарди долари присилни продажби што го обележаа минатомесечниот пад.

Покрај тоа, повторно се најде во фокус корелацијата на биткоинот, како показател на шпекулативниот замав, со акциите на технолошките компании, бидејќи поевтинувањето на криптовалутата дојде во период кога пад на вредноста забележаа и фирмите од секторот за вештачка интелигенција, вклучувајќи ја и највредната компанија во светот, „Енвидија“ (Nvidia), поради засилени сомнежи во исклучително високите процени на нивното работење.

„Неговата (биткоиновата, заб. авт.) реакција на падовите на индексот Nasdaq покажува дека тој и понатаму го следи расположението на инвеститорите кон ризикот“, забележа пазарниот аналитичар Мат Симпсон во авторски текст објавен кон крајот на минатата недела.

Ефектот на Трамп

Пошироко гледано, Андрејевиќ напоменува дека во моментов речиси сите пазари на капитал бележат пад на цените и дека било природно да се очекува пад и кај биткоинот. „На пример, цената на златото е во пад од 12 отсто, а индексот S&P 500 за три отсто, па затоа е сосема нормално да се очекува нешто поголема волатилност на криптопазарот.“

Соговорникот на „Блумберг Адрија“ истакнува дека неодамнешните ликвидации што се случија поради воведувањето царини кон Кина од страна на Соединетите Американски Држави (САД) значително влијаеле врз ликвидноста на пазарот. „Особено кај алткоините, кои, слободно можам да кажам, се во еден вид балон сличен на дотком-балонoт од двеилјадитите. Едноставно, има повеќе од 100 милиони бескорисни токени, а повеќе од 85 отсто од нив се наоѓаат на блокчејнот Солана, што дополнително го разредува капиталот на малите инвеститори што вложуваат без никаква контрола врз ризиците.“

Според неговите зборови, на моменталната нестабилност најмногу влијае таканаречената „Трамп-сезона“, покрај традиционалните „биковски“ и „мечкини“ трендови.

Bloomberg

„Со Доналд Трамп берзите секогаш се како своевиден ролеркостер, па на тоа треба да се навикнеме и добро да ги контролираме ризиците“, заклучува Андрејевиќ.

Што може да се очекува во наредниот период

Гледајќи напред, Тилен предупредува дека процесот на затворање позиции за биткоин би можел да потрае до пролет. За време на „мечкинииот“ пазар во 2021–2022 година, големите сопственици продале повеќе од еден милион биткоини во текот на речиси една година – обем што, според него, би можел да се повтори. „Ако ова се одвива со слично темпо“, изјави тој, „може да гледаме ваква состојба уште шест месеци“.

Тој не очекува катастрофален пад, но гледа простор за понатамошно намалување на цената. „Не сум приврзаник на теоријата за циклуси“, рече Тилен, „но претпоставувам дека сега ќе влеземе во фаза на консолидација и можеби уште малку ќе се спуштиме надолу. Најниската цена што ја очекувам е 85.000 долари.“

Андрејевиќ очекува дека биткоинот и понатаму ќе создава „одлични, но не и исклучителни приноси“. „Сосема е логично предавањето на штафетата. Претпоставувам дека ова е преоден период во кој биткоинот се трансформира во поинаков вид средство, средство што пред сè ќе се користи за зачувување на богатството. Ова ќе потрае, но на трпеливите може да им донесе стабилност и мали ризици.“

Bloomberg

Со оглед на тоа што повеќе од 15 отсто од сите биткоини моментално ги држат компании, ЕТФ-ови, влади, инвестициски фондови, берзи и слични играчи – познати под прекарот „паметни пари“ (smart money) – тој смета дека тенденцијата на прилив на капитал на подолг рок ќе продолжи, со повремени турбуленции.

„Кога станува збор за алткоините, во наредниот период пред сè очекувам нивното ценовно движење да се одвои од влијанието на биткоинот, секако со зголемена волатилност. Што се однесува до нив, треба да се биде многу повнимателен поради можниот потенцијален балон за кој веќе спомнав. Во секој случај, криптопазарот во своето ценовно движење и понатаму останува мошне сличен со акциите на компаниите – односно помалите алткоини можат да се споредат со популарните ‘penny stocks’ и при секоја економска турбуленција стануваат крајно чувствителни, а поради помалата ликвидност – волатилноста може да биде значителна“, нагласува Андрејевиќ.