Вртоглав пад на биткоинот под 100.000 долари, што се случува?

Биткоинот падна по летниот раст, губејќи ги добивките што ги оствари за време на еуфоријата на Волстрит и растот на институционалните вложувања.

Изворната криптовалута падна дури за 7,4 отсто, на 96.794 долари, во вторникот во Њујорк, што е првпат да падне под 100.000 долари од јуни. Ова претставува пад од повеќе од 20 отсто во однос на највисоката вредност, која ја достигна минатиот месец, што е типичен знак за мечкин пазар, кој се карактеризира со пад на цените на акциите. Етерот падна за 15 отсто, а некои други криптовалути (т.н. алткоини) забележаа слични падови, со што многу од помалку ликвидните и лесно разменливи токени изгубија повеќе од 50 отсто од вредноста годинава.

Пресвртниот момент се случи во октомври, кога сурова серија на ликвидации збриша милијарди долари од бујните позиции на оние што се обложуваа на раст. Оттогаш, трговците останаа настрана. Отворените позиции во биткоин-фјучерси се далеку под нивото пред крахот, а дури и кога трошоците за финансирање станаа поволни, малкумина се решија повторно да влезат на пазарот. Резултатот е: биткоинот има раст за помалку од 10 отсто годинава, што е значително помалку од растот на акциите, и повторно не успеа да ја исполни улогата како заштита за портфолијата.

„Падот на биткоинот до јунскиот минимум ја одразува пазарната структура, која сѐ уште се бори со психолошката тежина од октомвриските масовни ликвидации, што суштински го промени однесувањето на учесниците при тековниот пад“, изјави Крис Њухус, директор на истражувања во фирмата „Ергонија“, која се специјализира за децентрализирани финансии.

Може да се каже дека ова е продажба без големо уверување. Вкупната ликвидација на позиции (долги и кратки) за вторникот изнесуваше само милијарда долари, според податоците на „Коинглас“ (Coinglass). Тоа е значително намалување во однос на рекордот од околу 19 милијарди долари што беа изгубени на 10 октомври.

Во меѓувреме, трговците со опции изградија големи хеџ-позиции против понатамошни падови, со најголема побарувачка за опции за продажба со цена од 80.000 долари, кои истекуваат во ноември, според податоците на криптоберзата „Дерибит“ (Deribit), која е во сопственост на „Коинбејс“ (Coinbase).

Падот на биткоинот ја следи реакцијата на високотехнолошките акции оваа недела, каде што фирми како „Палантир“ и „Енвидија“ се во пад, поради новите сомнежи за преценетите вредности на овие компании. Биткоинот, кој често се смета за показател за шпекулативниот бум, повторно паѓа во согласност со расположението на пазарот на акции.

 

Криптовалутата закрепна делумно во раните тргувања во Азија во средата, зголемувајќи се за 1,6 отсто. Во 8:27 часот по локално време во Сингапур се тргуваше на 101.130 долари, додека другите токени ги намалија своите загуби.

Криптовалутите се соочуваат со неколку други пречки, вклучувајќи ги одливите од берзанските криптофондови и загриженоста за можни продажби од страна на фирмите што поседуваат дигитални активи во своите трезори.

И ЕТФ-овите за биткоин и етер имаат одливи во последниот месец, што укажува на забавување на побарувачката од инвеститорите по силниот раст што го имаа годинава. И додека во ноември сè уште е рано да се зборува, трендот досега е негативен, што укажува на пауза во импулсот на секторот.

„Додека долгорочната насока на пазарот останува јасно негативна, сериозноста на ликвидациите во октомври го спречи продолжувањето на кратките позиции со голема увереност, што резултираше со пазар доминиран од тактички, краткорочни тргувачки трансакции, наместо посветено вложување“, вели Њухус.