ЕТФ со биткоин на „Блекрок“ загуби 2,7 милијарди долари во рекорден одлив

„Ајшеарс биткоин траст“ (iShares Bitcoin Trust) на „Блекрок“ (BlackRock Inc.) ја забележа својата најдолга низа неделни повлекувања од своето деби во јануари 2024 година, што е знак дека институционалниот апетит за најголемата криптовалута во светот останува намален дури и во услови кога цените се стабилизираат.

Според податоците што ги обезбеди „Блумберг“, во текот на петте недели заклучно со 28 ноември, инвеститорите повлекоа повеќе од 2,7 милијарди долари од фондот што се тргува на берза. Со дополнителни 113 милиони долари откуп што се случи вчера, ЕТФ сега е на пат да оствари нето-одливи шеста недела по ред.

Bloomberg Mercury

 

Фондот надгледува имоти од повеќе од 71 милијарда долари и служи како водечко средство за традиционалните инвеститори што бараат изложеност на биткоин. Континуираниот период на одливи се совпаѓа со падот на биткоинот во мечкиниот пазар по тешката ликвидација на почетокот на октомври, што поттикна пад на вредноста на криптовалутите за повеќе од еден билион долари.

„Блекрок“ не одговори веднаш на барањето за коментар.

 

Иако биткоинот оваа недела малку закрепна, одржливите одливи од ЕТФ покажуваат дека расположението се промени на пазарот, на кој долго време доминираше замав.

„Трендот означува јасен пресврт од упорниот режим на прилив што претходно ја поддржуваше цената и одразува ладење на новата распределба на капиталот во активата“, соопшти фирмата за блокчејн-аналитика „Гласнод“ (Glassnode) во својата неодамнешна белешка.

Биткоинот денеска се тргува по цена од околу 92.000 долари, што е намалување на вредноста од 27 проценти од својот врв во октомври.