Каква судбина го чека биткоинот во 2026-та?

Патот на биткоинот низ 2025 година беше обележан со изразени осцилации и висока нестабилност. Во поголемиот дел од годината сè изгледаше позитивно – поради приливот во биткоин берзанските фондови (ЕТФ), институционалното усвојување и намалувањето на понудата по „преполовувањето“ (англ. halving) – цената достигна рекордни нивоа.

Но, во октомври следуваше остра корекција, поради која најголемата криптовалута годината ја заврши со пад од околу 15 проценти, посочуваат од аналитичкиот тим на „Блумберг Адрија“.

Гледано на криптопазарот како целина, во апсолутни бројки вредноста на сите криптовалути падна за повеќе од десет проценти на годишно ниво. Пазарната капитализација на целиот пазар се проценува на 2,92 билиони долари, во споредба со 3,26 билиони долари на почетокот на 2025-та, според податоците на аналитичката платформа „Коин маркет кап“ (CoinMarketCap).

Генерално, во текот на минатата година со биткоинот се тргуваше како со макро ризично средство. Неговата цена првенствено реагираше на промените во очекувањата поврзани со намалувањето на каматните стапки од страна на Фед и ликвидноста на доларот, додека ЕТФ-тековите и позиционирањето на пазарот на деривати ги засилуваа нагорните, односно надолните трендови.

Поголемиот дел од другите водечки криптовалути во голема мера го следеа истиот образец. Во најголем дел, следејќи го биткоинот, тие достигнуваа нови циклични максимуми, пред да претрпат длабоки корекции кои ги оставија приближно непроменети или умерено негативни на годишно ниво до декември.

Фактори што ќе го обликуваат криптопазарот

Гледајќи напред во 2026 година, изгледите за биткоинот и поширокиот криптопазар остануваат поврзани со три главни столба: институционалните текови, макроекономската политика и регулативата.

Душко Гошевски, адвокат и познавач на пазарот, ја истакнува улогата на постепеното зголемување на институционалното присуство: „Расте учеството на инвестициски фондови и дел од традиционалниот финансиски сектор, што ја подобрува ликвидноста, ја зајакнува инфраструктурата и го намалува оперативниот ризик, иако непредвидливоста останува присутна како фактор.“

Душко Гошевски

Со оваа трансформација, криптопазарот станува поинтегриран со глобалните финансиски текови. Наместо да реагира изолирано, движењата сè повеќе се поврзани со макроекономските услови, монетарната политика и општиот апетит за ризик. Гошевски додава: „Регулаторната рамка, особено во Европа преку имплементацијата на MiCA и јасните правила за даватели на услуги, чување средства и транспарентност, го намалува оперативниот ризик и овозможува поголема правна предвидливост, што е клучно за долгорочна институционална интеграција.“

Доколку продолжи олабавувањето на монетарната политика на Фед и доларот ослабе, ликвидноста со текот на времето би требало да го поддржи биткоинот, особено ако ЕТФ-овите продолжат да привлекуваат капитал, а појасните регулаторни рамки поттикнат пошироко институционално учество.

Прогнози за цената на биткоинот

За прогноза за движењето на цената на биткоинот во 2026-та, мислење побаравме од Александар Тасевски, соосновач на „Крипто хаус“, кој посочи дека во однос на цената која фигурира во моментот, грубо меѓу 85.000 и 90.000 долари, очекува годинава да има и пад и раст...

Александар Тасевски

Имено, Тасевски има две сценарија од кои првото е конзервативно и според ова сценарио биткоинот би можел да падне некаде до 70.000 долари, но и да порасне до 150.000 долари.

„Дали прво ќе дојде падот, а потоа растот не можам да кажам со сигурност, но лично ми се чини дека во 2026-та ќе имаме таков редослед на настаните“, посочува тој.

Во неговото второ, поагресивно сценарио, вредноста би можела да падне и под 60.000 долари, но од друга страна биткоинот би можел да отиде и над 170.000 или 180.000 долари во текот на 2026-та. 

 

„Лично сметам дека пореална е првата, поконзервативна варијанта. Тоа значи осцилација меѓу 70.000 и 150.000 долари во текот на годината. Сепак ништо од ова не е загарантирано бидејќи гледаме во какви рамки се движи светот, колку е нестабилен, а секоја нестабилност лошо се одразува врз криптовалутите и инвеститорите кои бараат сигурност“, нагласи Тасевски.

Во однос на другите криптовалути, нивните изгледи остануваат поврзани со истите двигатели како и кај биткоинот – ликвидноста, регулативата и институционалната побарувачка – но пазарните очекувања генерално го фаворизираат биткоинот и неколку водечки валути во однос на помалите, шпекулативни токени.