Ја избегна ли биткоинот „спиралата на смртта“?

По oстриот пад на цената на криптовалутите, цените се стабилизираа и закрепнаа. Дали биткоинот, најголемата криптовалута, ја избегна смртоносната спирала?

Цената на биткоинот закрепна откако во петокот падна под 60.000 долари, а истиот ден порасна на околу 70.000 долари, каде што остана за време на викендот. Цената од 60.000 долари претставува пад од речиси 50 отсто во однос на највисоката вредност во октомври од 126.000 долари.

Во меѓувреме цената на акцијата на „Стратеџи“ (Strategy), најголемата трезорска компанија што акумулира биткоини, исто така нагло закрепна во петокот. Акцијата порасна за 26,11 отсто тој ден, од 114,9 долари на 134,93 долари по акција.

Ден претходно, во четвртокот, цената на акцијата на „Стратеџи“ падна на 104,17 долари по акција, што е најниска вредност од февруари 2024 година. Акцијата е сè уште 70 отсто под својата рекордна цена од 455 долари постигната во јули минатата година.

Цената на акцијата на „Стратеџи“ е важна бидејќи компанијата поседува повеќе од 700.000 биткоини, а нејзините проблеми може да го турнат биткоинот во таканаречена „спирала на смртта“.

Биткоините на „Стратеџи“ вредат помалку од нивната куповна цена

Со последниот пад на цената на биткоинот, биткоините на „Стратеџи“ сега вредат помалку од просечната цена по која ги купила компанијата. Просечната куповна цена на биткоините за „Стратеџи“ изнесува 76.052 долари.

Ако компанијата биде принудена да започне да продава биткоини за да отплати долгови, тоа може дополнително да го притисне пазарот и да ја придвижи „спиралата на смртта“.

На оваа опасност неодамна предупреди и Домен Крегар, аналитичар во брокерската куќа „Илирика“.

„Ако компаниите бидат принудени да продаваат свои долгорочни инвестиции во криптовалути, тоа дополнително ќе го притисне пазарот. Ова е неповолна ситуација, која во моментов укажува на повеќе негативни отколку позитивни сценарија на краток и среден рок“, изјави Крегар.

На опасноста неодамна предупреди и легендарниот инвеститор Мајкл Бери, кој стана познат по обложувањето против американскиот пазар на недвижности пред финансиската криза во 2008 година.

Тој предупреди дека падот на биткоинот може да ја продлабочи „спиралата на смртта“, која би им нанела трајна штета на компаниите што во последната година го акумулирале овој токен.

Во белешката на платформата „Сабстек“, Бери напиша дека основната криптовалута, која изгубила 40 отсто од својата вредност од својот врв во октомври, се покажала како исклучително шпекулативен имот и не успеала да послужи како заштита од девалвацијата на валутите, како што се на пример благородните метали.

„Сценариото на судниот ден сега е на дофат“, напиша Бери. „Ако биткоинот падне уште 10 отсто, ‘Стратеџи’, најголемиот светски корпоративен чувар на криптовалути, ќе биде во минус за милијарди, а пазарите на капител практично ќе затворат.“ Натамошните падови, посочи тој, ќе ги турнат рударите на биткоин во банкрот.

Мајкл Сејлор ги смирува инвеститорите

„Стратеџи“ во четвртокот објави резултати за четвртиот квартал, покажувајќи нереализирана оперативна загуба од 12,6 милијарди долари.

Во текот на обраќањето до инвеститорите, соосновачот на „Стратеџи“ и извршен претседател Мајкл Сејлор изјави дека биткоинот мора да падне на околу 8.000 долари и да остане на тоа ниво неколку години пред да започнат сериозни проблеми со отплатата на долговите.

Сејлор изјави дека компанијата не се соочува со повици за дополнување на маржата и дека има 2,25 милијарди долари готовина, што е доволно за покривање на каматите и исплата на дивиденди повеќе од две години.

Од компанијата истакнаа дека повеќе од 200.000 луѓе го следеле преносот од обраќањето на инвеститорите во живо.