text size
Русија на крајот од минатата година сè уште вршела речиси половина од целата трговија во валутите на нејзините противници што воведоа санкции поради инвазијата на Кремљ врз Украина, иако јуанот и рубљата длабоко навлегоа во процесот на трансакции.
Плаќањата за извоз со тие што Банката на Русија ги нарекува „токсични“ валути, првенствено американскиот долар и еврото, учествуваа со 48 проценти од вкупниот износ на крајот на 2022 година, што е намалување од 87 отсто, колку што изнесуваше учеството на овие валути на почетокот на годината.
Уделот на јуанот се зголеми на 34 отсто од 0,5 отсто, а на руската национална валута, рубљата, отпаѓаат 16 отсто, покажува денешниот извештај на централната банка. Извештајот даде детална слика за тоа што руската централна банка го опишува како „широка структурна трансформација на руската економија“.
Трговската размена на Русија претставена со процентуално учество на валутите во кои се реализирале трансакциите / Bloomberg Mercury
Иако обемот на трговијата што се врши со користење валути на наводните непријателски земји нагло се намали, Банката на Русија соопшти дека нивниот удел е сè уште значаен.
Санкциите ја лишија централната банка од пристап до околу половина од нејзините меѓународни резерви, оставајќи ја само со сопственоста на злато и јуани. Пред војната, Банката на Русија со години ја намалуваше изложеноста на доларот.
Целта на мерките, односно санкциите од Западот, е да ја изолираат Русија од меѓународните финансиски пазари, а тоа доведе и до егзодус на странски инвеститори од земјата. Како одговор, централната банка на Русија се обиде да ги обесхрабри бизнисите да користат „токсични“ долари и евра.
Во денешниот извештај за ризиците на финансискиот пазар, централната банка напоменува дека, со исклучок на јуанот, валутите на другите „пријателски“ земји сè уште ретко се користат и претставуваат само два отсто од извозните плаќања.
Сепак, повлекувањето на „токсичните“ валути зема замав во другите делови на економијата. Во тргувањето на Московската берза обемот во долар-рубља минатиот месец изнесуваше само 36 проценти од вкупниот промет, што, според централната банка, е најниско ниво во последните години. Кога станува збор за увозот, „токсичните“ валути учествуваа со 46 отсто во декември 2022 година, што е намалување од 65 проценти во јануари истата година. Уделот на јуанот, пак, се зголеми од четири на 23 проценти. Постепеното исфрлање на еврото, што во голема мера се случи во првата половина на 2022 година, значи дека разликата помеѓу извозот и увозот платени во европска валута стана негативна, според централната банка.
.webp){kind=icon}
