Денеска истекува рокот во кој граѓаните можат да запишат граѓански обврзници од втората емисија, за која аукцијата ќе се одржи утре, соопштија од Министерството за финансии.
Барањето за учество на аукцијата и уплатата на средствата за кои граѓаните сакаат да купат граѓански обврзници може да се направат во сите деловни банки во земјава.
Министерството за финансии проспектот за втората емисија на граѓанска обврзници го објави на 18 октомври, на износ од 10 милиони евра. Граѓаните имаат можност да уплатат средства за запишување граѓански обврзници денеска, а утре ќе се одржи аукцијата, по што ќе почне процесот на запишување на граѓанската обврзница на име на граѓаните во Централниот депозитар за хартии од вредност.
Според проспектот, каматата на обврзниците е 5 отсто годишно, односно за две години вкупно 10 проценти на вложениот износ. Исплатата на првиот купон ќе се изврши на 14 ноември 2024 година, додека вториот купон, односно каматата за втората година на 14 ноември 2025 година, истовремено со исплатата на вложените средства. Граѓаните можат да вложат минимално 10.000 денари, со купување една граѓанска обврзница.
„Граѓанската обврзница е нов инструмент на домашниот финансиски пазар, кој го издава државата. Инвестицијата во граѓанска обврзница е безризична и сигурна, носи атрактивен принос за граѓаните и притоа ја штити вредноста на нивните пари“, велат од Министерството за финансии.
Првата емисија на граѓански обврзници беше во јули годинава, на која беа запишани обврзници во вредност од 23,5 милиони евра, односно интересот беше два и пол пати поголем од објавениот износ. Од Министерството велат дека граѓанската обврзница ќе биде присутна во континуитет на пазарот.
Покрај граѓанската обврзница, како нов инструмент Министерството за финансии ја лансира и зелената обврзница, а ќе следуваат и развојна и проектна обврзница. Целта на овие обврзници е мобилизирање на приватниот капитал во функција на развој и забрзување на економскиот раст.
.webp){kind=icon}
Во моментов нема коментари за веста. Биди прв да коментира...