Два производители на алуминиум од Блискиот Исток беа погодени од ирански напади во саботата, што ја нагласува заканата за глобалната економија додека војната ги нарушува клучните индустрии.
Најголемиот производител во регионот, „Емиратс Глобал Алуминиум“ (Emirates Global Aluminium), соопшти дека претрпел „значителна штета“ на својот објект во Абу Даби, додека „Алуминиум Бахреин“ (Aluminium Bahrain) соопшти дека ја проценува штетата на својата фабрика.
Нападите претставуваат уште еден удар за суровинската индустрија во регионот, при што производителите во голема мера се спречени да извезуваат поради фактичкото затворање на Ормускиот теснец. Покрај нарушувањата во транспортот, иранските напади оштетија клучни постројки, што најверојатно ќе го продолжи периодот потребен за нормализирање на производството по завршување на војната.
Цените на алуминиумот, кои веќе растеа пред конфликтот, дополнително се зголемија бидејќи трговците и купувачите се фокусираат на ризикот од поограничена понуда и намалување на глобалните залихи. Блискиот Исток учествува со околу 9 отсто од светското производство, а голем дел од таа понуда сега е блокирана во Ормускиот теснец. Повисоките цени на суровините ќе вршат притисок врз глобалните економии, според „Голдман Сакс“ (Goldman Sachs Group).
„Емиратс Глобал Алуминиум“ сѐ уште ја проценува штетата од нападот врз својот објект Ал Тавила, лоциран во индустриската зона на пристаништето Калифа во емиратот Абу Даби, соопшти компанијата. Потврди и дека неколку вработени се повредени, но не откри дали производството во објектот е прекинато.
Канцеларијата за медиуми на Абу Даби претходно во саботата соопшти дека шест лица се повредени во три пожари предизвикани од остатоци од пресретнати балистички ракети во близина на индустриската зона Кезад. Нападите се дел од серијата удари на Иран врз земјите од Заливот, во време кога администрацијата на Доналд Трамп води разговори за можен прекин на огнот.
Како најголема индустриска компанија надвор од енергетскиот сектор во Обединетите Арапски Емирати, „Емиратс Глобал Алуминиум“ управува со две топилници, по една во емиратите Дубаи и Абу Даби. Објектот Ал Тавила се наоѓа помеѓу двата града, во економската зона Калифа долж Персискиот Залив. Погонот во Дубаи е сместен во пристаништето и слободната зона Џебел Али.
Топилницата Ал Тавила во 2025 година произвела 1,6 милиони тони ливен метал. Компанијата имала значителни резерви на метал надвор од земјата кога Израел и САД ја започнаа војната со Иран минатиот месец, како и на неколку странски локации, се наведува во соопштението. Токму тие резерви ги користи за да ја задоволи побарувачката на клиентите.
„Емиратс Глобал Алуминиум“ е значаен меѓународен инвеститор и дел од заложбата на ОАЕ да инвестираат 1,4 билиони долари во САД во следната деценија. ОАЕ е втор најголем снабдувач на алуминиум за САД, веднаш зад Канада, а компанијата гради и прва нова топилница во САД по повеќе децении, во Оклахома.
Во САД, компанијата поседува и постројка за рециклирање во Минесота, што ѝ овозможува да профитира од повисоките цени на домашно произведените метали, поттикнати од царините на американскиот претседател Доналд Трамп.
.webp){kind=icon}
