Европскиот увоз на ЛНГ го продолжи падот од април, а испораките кон Азија растат

Европскиот увоз на течен природен гас е на пат да забележи пад втор месец едноподруго, бидејќи војната со Иран ги нарушува испораките.

Во првите две недели од месецов испораките на ЛНГ кон регионот го продолжија падот што започна во април, покажуваат податоците за следење на бродовите. Според процените на компанијата за анализа на податоци „Кплер“ (Kpler), увозот би можел да се намали за повеќе од 1 отсто на годишно ниво до крајот на мај, по падот од 7 отсто во април.

Падот на увозот на ЛНГ доаѓа во време кога потрошувачката на гас во Европа би можела да порасне во мај, според „Енерџи аспектс“ (Energy Aspects Ltd.). Иако падот е помал од минатиот месец - а конечните бројки може да се променат бидејќи танкерите понекогаш ги менуваат рутите - податоците покажуваат дека европските резерви стануваат сè поограничени во време кога регионот се обидува да ги дополни резервите од гас пред следната зима.

Испораките на ЛНГ се движат кон втор месец на пад

Bloomberg

Побарувачката за греење во одредени периоди од мај е зголемена поради заладувањата, а потрошувачката на гас во енергетскиот сектор исто така пораснала поради ремонтите во дел од постројките на лигнит, јаглен и биомаса, изјави аналитичарката на „Енерџи аспектс“ Ериса Паско.

Во исто време испораките на ЛНГ кон Кина и другите делови од Азија се зголемени, бидејќи купувачите таму бараат поголеми количества на самото место, додека конфликтот на Блискиот Исток го задржува катарскиот гас зад Ормускиот Теснец. Глобалната побарувачка за гас падна откако војната ги наруши испораките, но Европа би можела да плаќа повеќе во потоплите месеци, кога потребите за ладење во Азија растат и купувачите бараат дополнителни енергетски испораки.

„Во моментов гледаме зголемување на пренасочувањето на бродовите кон Азија, особено поради стабилната побарувачка во земјите од Јужна Азија“, изјави Роналд Пинто, главен аналитичар за гас и ЛНГ во „Кплер“.

Сезонските ремонти во дел од европските терминали за регасификација исто така влијаеле врз увозот на ЛНГ во регионот, додаде тој.