Сопствениците на бродови ги пресметуваат ризиците за транзит низ Ормуз

Сопствениците на бродови дадоа мешана слика за нивната подготвеност да продолжат со транзит низ Ормускиот Теснец откако претседателот Доналд Трамп рече дека примирјето меѓу САД и Иран е „завршено.“

Од пет сопственици анкетирани од „Блумберг“, чии бродови минале низ овој витален канал за проток на енергија во последните недели, тројца рекоа дека проценуваат дали сè уште е безбедно да се транзитира, додека двајца рекоа дека засега не ги промениле своите политики.

Кога станува збор за протокот на нафта, многу ќе зависи од пристапот на „Синокор груп“, најголемиот сопственик на супертанкери во светот и клучен играч во сообраќајот низ Ормуз од почетокот на конфликтот. Еден од нивните бродови беше нападнат во вторникот, а три брокери што работат со компанијата рекоа дека не добиле ажурирање за нивната моментална позиција околу транзитирањето.

Ризикот од враќање во целосна војна изгледа дека расте, затоа што Трамп кој предупреди дека САД веројатно ќе извршат нови напади врз Иран и би можеле да ја обноват блокадата на иранските пристаништа.

Во овие околности, колку сурова нафта ќе продолжи да излегува од теснецот - и последиците врз глобалните цени на нафтата - може да зависи од одлуките на малата група сопственици на бродови кои досега беа подготвени да влезат во Ормуз.

Двајца сопственици кои претходно испраќале бродови во Ормуз покажаа одредена подготвеност да продолжат. Нивните бродови минале низ теснецот под закрила на ноќта во часовите откако САД ги обновија нападите врз Иран, според податоци за следење на бродови собрани од „Блумберг“.

Видливиот сообраќај во средата беше придушен на оманската страна од Ормус - коридор што стана примарна алтернатива на водите под контрола на Иран. Среде засилените тензии, бродовите веројатно ќе транзитираат без да ги емитуваат своите локации. Тенденцијата на некои танкери да излегуваат од Персискиот Залив во конвој формации исто така ги прави дневните бројки нестабилни.

Приходите на танкерите, кои го одразуваат трошокот за влез во Персискиот Залив, пораснаа на повеќе од 340.000 долари дневно во средата - 50.000 долари повеќе од крајот на минатата недела. Овој показател е многу неликвиден откако започна војната со Иран и е склон кон големи осцилации.

Поголемите трошоци за транспорт ќе бидат нова главоболка за производителите од Заливот, кои веќе се соочуваат со недостиг од бродови подготвени да влезат во Ормуз. Минатиот месец, Ирак мораше да го намали производството на некои полиња затоа што не можеше да најде доволно бродови за да ги натовари своите пратки.