Бакарот достигна нов рекорд поради ограничената понуда и стравот од царини

Бакарот го продолжи растот и достигна ново рекордно високо ниво втор ден по ред, бидејќи ограничената понуда на краток рок и очекувањата дека САД ќе воведат царини за увоз на рафиниран бакар ги поддржаа цените.

Овој индустриски метал поскапи четврти ден по ред на Лондонската берза за метали (LME), достигнувајќи историски максимум од 14.617 долари за тон. Бакарот порасна за околу 17 отсто од почетокот на годината, поттикнат од долгорочниот дисбаланс меѓу ограниченото снабдување од рудниците и растечката побарувачка од центрите за податоци, опремата за обновлива енергија и електроенергетските мрежи.

Bloomberg

Краткорочната затегнатост на пазарот дополнително е засилена од масовното пренасочување на рафиниран бакар кон САД, со цел да се искористат повисоките цени поради можните царини. Овие текови ги намалија залихите во складиштата на Лондонската берза за метали. Тоа предизвика сериозен недостиг минатиот месец и ја задржа кривата на фјучерсите во состојба што сигнализира недоволна понуда.

Побарувачката во Кина, најголемиот светски потрошувач на бакар, исто така се очекува да зајакне бидејќи пазарот влегува во традиционално силен период за производствениот сектор, по неодамнешниот застој. Залихите во магацините на Шангајската берза на фјучерси минатата недела паднаа на најниско ниво од 2024 година наваму.

„Треба да биде лесно бакарот да достигне 15.000 долари за тон“, изјави Џиа Џенг, менаџер за тргување во „Сузоу“ ( Suzhou Chuangyuan Harmony-Win Capital Management Co). Според разговорите со клиентите, нарачките од „Стејт грид корп“ (State Grid Corp. of China) изгледаат охрабрувачки, додаде таа.

Оперативните проблеми кај големите проекти за експлоатација на бакар ги зголемуваат стравувањата за снабдувањето, при што постои ризик глобалното рударско производство да го забележи првиот годишен пад од 2017 година, освен ако производството не закрепне во втората половина од годината.