„ЏП Морган“ веќе не знае како да прогнозира околу нафтата – не се гледа крајот на војната со Иран

По повеќе од шест месеци од почетокот на војната со Иран, аналитичарите за нафта на „ЏП Морган“ (JPMorgan Chase & Co.) го потврдуваат она што многу трговци приватно го говорат веќе некое време: патот кон крајот на војната станува сè потежок за предвидување.

Неколку економски „црвени линии“ за кои банката претпоставуваше дека американската администрација нема да сака да ги премине — вклучително и порастот на цената на нафтата над 100 долари за барел, цените на бензинот кои се приближуваат до 5 долари за галон и наглиот раст на приносите на државните обврзници — веќе се случија, што ја прави стратегијата за излез помалку јасна, наведоа аналитичарите, меѓу кои и Наташа Канева, во својот извештај.

Трговците со нафта и аналитичарите се сè понесигурни околу тоа колку долго ќе трае војната со Иран, додека цените на енергенсите растат, а последиците од тоа се закануваат да го загрозат глобалниот економски раст и да ја поттикнат инфлацијата. Критичната енергетска инфраструктура, вклучително и виталниот нафтовод „Исток-Запад“ на Саудиска Арабија, неодамна беше цел на напади, што ги зголеми стравувањата од дополнителни проблеми во снабдувањето.

„Според нас, пазарот во страшна напната состојба“, наведоа аналитичарите во извештајот, кој во четвртокот беше масовно цитиран од пазарните учесници. Фер вредноста на нафтата за септември се проценува на околу 90 долари за барел, иако цените се блиску до 106 долари, велат аналитичарите, додавајќи дека тоа укажува оти пазарот го вкалкулира ризикот од дополнителна загуба во снабдувањето од 4 милиони барели дневно, покрај веќе прекинатите 10 милиони барели дневно.

„Без јасни сигнали ниту од САД, ниту од Иран дека се подготвени за деескалација — и во отсуство на дипломатски успех на 24 септември, кога е предвидена средба меѓу претседателот Трамп и претседателот Џјинпинг во Вашингтон — претпоставката дека нарушувањето е привремено станува сè потешко одржлива“, напишаа аналитичарите.

Глобалните залихи се намалија за време на војната, но засега сè уште постои доволен заштитен слој за да се ограничи понатамошниот раст на цените на суровата нафта, велат тие.

Меѓутоа, доколку протокот на нафта од Блискиот Исток остане на сегашните нивоа, компанијата проценува дека цените во четвртиот квартал и во декември 2026 година би можеле да бидат за 7, односно 8 долари повисоки од сегашните прогнози од околу 80 и 78 долари за барел, респективно.