Цената на нафтата на светскиот пазар порасна поради очекувањата дека ОПЕК+ ќе ги продлабочи намалувањата на понудата, но и по шпекулациите дека Кина би можела да ги олесни мерките за коронавирусот, откако се разгореа протестите во земјата што е најголем увозник на нафта во светот.
ВТИ (West Texas Intermediate - WTI) скокна на 79 долари за барел, откако во понеделникот направи пресврт кон добивка по извештаите дека ОПЕК+ може да размисли за намалување на понудата. На отворањето на неделата, нафтата беше најевтина од декември, бидејќи зголемениот број случаи на ковид-19 и демонстрациите против строгите ограничувања низ Кина силно го погодија „црното злато“.
Официјалните лица во Кина денеска треба да одржат брифинг за мерките за спречување и контрола на ковид-19, најава што ги зголеми добивките во ризичните средства, вклучувајќи ги и стоките и акциите. Во исто време, доларот ослабе, што придонесе цените на стоките деноминирани во американската валута да станат атрактивни.
Bloomberg Chartmaker
Нафтата загуби околу девет отсто овој месец, бидејќи заострената монетарна политика поставува основа за глобално забавување што може да ја загрози потрошувачката на енергија. Тие грижи, заедно со сомневањата за побарувачката во Кина, го наведоа ОПЕК+ да објави големо намалување на производството минатиот месец, а делегатите од групата сега велат дека опција може да бидат и дополнителни намалувања. Пред состанокот, пазарните показатели укажуваат на изобилство краткорочни резерви на сурова нафта.
Цени:
- ВТИ за испорака во јануари се зголеми за 1,8 отсто, на 78,64 долари за барел на њујоршката берза, во 5:50 часот. Цената беше 73,60 долари во понеделник наутро, најниска од декември 2021 година.
- Брент за јануарско порамнување зајакна за 2,2 отсто, на 85,05 долари за барел на берзата „ИЦЕ фјучерс Европа“ (ICE Futures Europe).
Набљудувачите на пазарот го одмеруваат следниот чекор на ОПЕК+. Индустрискиот консултант ФГЕ (FGE) смета дека картелот би можел да одлучи да го намали производството за уште два милиона барела на состанокот на 4 декември за да се спротивстави на нестабилниот пазар, додека од „РБЦ капитал маркетс“ (RBC Capital Markets) очекуваат или нема промена во понудата или намалување до милион барели, делумно во зависност од тоа како стојат цените неделава.
.webp){kind=icon}