Цените на природниот гас во Европа ја започнаа новата година со благ пораст бидејќи трговците се соочија со ниска ликвидност за време на празничната сезона и благи временски услови.
Референтните цени на фјучерсите се зголемија во понеделникот, откако првично паднаа на најниско ниво од пред руската инвазија врз Украина. Додека временските прогнози укажуваат на температури над сезонските норми за поголемиот дел од регионот во следните две недели, Европа сè уште треба внимателно да управува со своите зимски резерви.
По една година на екстремна нестабилност - со рекордно високи трошоци за енергија во услови на војна на границите на Европа - 2023 година ќе биде година на нови тестови за континентот кој бара алтернативи за ограничените руски испораки. Во исто време, увозот на течен природен гас помогна референтните цени да бидат за околу 47 отсто пониски во декември.
Bloomberg
Вкупниот обем на тргување беше помал во понеделникот поради одморите во ОК.
Умерените температури подолг период, заедно со типичното забавување на индустриската побарувачка на крајот на годината, може да помогнат регионот да биде добро снабден до крајот на сезоната.
Германскиот канцелар Олаф Шолц изјави дека енергетската криза предизвикана од инвазијата на Владимир Путин на Украина е „тежок тест“ за најголемата економија на континентот и ги повика граѓаните да продолжат да штедат енергија во наредните месеци. Нивото на складирање на гас во Германија се зголеми на 90 отсто во текот на изминатата недела, во споредба со петгодишниот просек од 73 отсто за овој период од годината.
Новите терминали за увоз на ЛНГ „на долг рок ја прават нашата земја и Европа независни од рускиот гас“, рече Шолц во своето новогодишно обраќање до нацијата.
Фјучерсите на холандскиот гас за следниот месец се намалија за 0,9 отсто, на 77,02 евра за мегават-час.
.webp){kind=icon}
