ОПЕК очекува малку позатегнат глобален пазар на нафта од прогнозираното, бидејќи групата ја зголеми процената за побарувачката и ги намали изгледите за понудата.
Организацијата на земји извознички на нафта ја зголеми својата проекција за количеството на сурова нафта што ќе треба да го испумпува оваа година за 250.000 барели дневно, на просечни 29,42 милиони барели дневно, се наведува во месечниот извештај.
Врз основа на тековните стапки на производство на ОПЕК, пазарите генерално ќе бидат избалансирани оваа година. Алијансата ОПЕК+ (Организацијата на земји извознички на нафта и нивните сојузници) посочи дека планира да се придржува до производствените квоти утврдени кон крајот на минатата година за остатокот од 2023 година, дури и во услови кога кинеската економија повторно се отвори, а Русија го намалува производството како одмазда за западните санкции.
Министерот за енергија на Обединетите Арапски Емирати денеска повтори дека светските пазари на сурова нафта се избалансирани, бидејќи зголемената побарувачка во некои региони се спротивставува со забавување на други места.
„Клучно за растот на побарувачката на нафта во 2023 година ќе биде враќањето на Кина од нејзините задолжителни ограничувања за движење. Загриженоста лебди околу длабочината и темпото на економското закрепнување на земјата“, соопшти ОПЕК.
Глобалната потрошувачка на нафта ќе се зголеми за 2,3 милиони барели дневно, или 100.000 дневно повеќе од проектираните пред еден месец, до просечни 101,87 милиони барели дневно оваа година, соопшти ОПЕК.
Организацијата ја намали својата процена за испораките надвор од групата во 2023 година за 150.000 барели дневно, на 67 милиони барели дневно. Тринаесетте членки на ОПЕК во јануари испумпаа просечно 28,88 милиони барели дневно.
.webp){kind=icon}
