.webp){kind=icon}
Цената на европскиот природен гас се упати кон четвртиот последователен неделен пад, при што побарувачката за гориво се очекува да се зголеми дури кон крајот на оваа година. Краткорочните фјучерси неделава го достигнаа најниското ниво од јули 2021 година, бидејќи индустриските потрошувачи чекаат пониските трошоци на големо да се одразат на нивните сметки за енергија пред да го зголемат купувањето гас.
Клучните потрошувачи, од хемиските компании до производителите на челик, не сакаат да ја вратат побарувачката откако рекордниот пораст на цените на енергијата минатата година ги натера да го ограничат производството во Европа. Тоа се совпаѓа со релативно придушената побарувачка на конкурентниот азиски пазар и привремената презаситеност во однос на глобалните резерви, што ги притиска цените надолу.
Иако постојат стравувања дека дел од уништената индустриска побарувачка може да биде траен, консултантите на „Енерџи аспектс“ (Energy Aspects Ltd) очекуваат потрошувачката сепак да земе замав во втората половина од годината.
„Очекуваме да почнеме да гледаме раст на побарувачката за гас на годишно ниво, почнувајќи од следниот месец, поради сè пониските цени, а растот потоа ќе се забрза во остатокот од годината. Без оглед на тоа, ние задржуваме одредена претпазливост дека оваа година може да дојде до трајна загуба на дел од побарувачката, која воопшто не зависи од цените“, велат аналитичарите, предводени од Џејмс Вадел.
Месечно движење на цената на холандскиот гас / Bloomberg Mercury
„Блумберг НЕФ“ (BloombergNEF) исто така очекува зголемување на побарувачката оваа година, како во текот на летото, зајакната со енергетскиот сектор, така и во претстојната зима, предизвикана од големиот пад на цените.
„Гледајќи напред, зимската прогноза содржи многу несигурност и ризик, што е евидентно“, се наведува во неделната белешка на „Блумберг НЕФ“.
Холандскиот гас за испорака во јуни, кој е најактивен договор во Европа и претставува репер за европскиот гас, денеска се тргуваше за 1,7 отсто пониско, по цена од 38,54 евра за мегават-час.
Цените за испораките во следните месеци исто така денеска се движеа на пониско ниво, но јануарскиот договор, кој е највисок за следната зима, почна да се движи во зоната на скромен неделен раст. Сепак, останува да се види колку побарувачката може да ги врати европските производители.
„Досега намалените трошоци за гас беа повеќе од компензирани со пониските цени за крајните производи и испораките“, рече денеска производителот на вештачки ѓубрива „Јара“ (Yara International ASA) во рамките на својата презентација на резултатите од првиот квартал.
