Златото се одржува стабилно над границата од 2.000 долари за унца

Златото ги задржа добивките, при што инвеститорите го насочија својот фокус кон претстојните податоци за инфлацијата во САД, кои ќе влијаат на следната одлука на Федералните резерви (ФЕД) за тоа кога да го паузираат циклусот на затегнување на монетарната политика.

Благородниот метал оваа недела порасна за речиси еден отсто по неговиот раст од 1,4 отсто минатата недела, со што е на дофат на рекордно високо ниво.

Податоците за основниот индекс на потрошувачки цени, кои треба да бидат објавени подоцна во текот на денешниот ден, се очекува да покажат дека вкупната инфлација во САД во април се зголемила за пет проценти на годишно ниво, ниво што веројатно ќе биде сè уште непријатно високо за ФЕД.

Трговците со опции сега се обложуваат на натамошни зголемувања на каматните стапки на следните состаноци на централните банкари во јуни и јули. Додека повисоките стапки се генерално негативни за некаматоносните златни прачки, златото би можело да влезе во сценарио на двојна победа (анг.: win-win), според високиот пазарен аналитичар Ед Моја од „Оанда“ (Oanda).

„Жешкиот извештај за инфлацијата ќе ги оправда повисоките стапки што се актуелни подолго време, што ќе ги намали изгледите за раст и ќе предизвика распродажба на берзата и потенцијално ќе ја засили краткорочната побарувачка за злато. Послаби податоци за инфлацијата може да ги оправдаат повиците дека претставниците на ФЕД завршиле со затегнување на монетарната политика и да поддржат намалувањето на стапката да се случи подоцна годинава“, вели Моја во белешката.

Во меѓувреме, кризата со максималната граница за американскиот долг дополнително го влошува расположението на инвеститорите. Неуспехот да се најде решение претставува вистински ризик за состојбата на доларот, зголемувајќи ја привлечноста на златото.

Златото се одржува стабилно на ниво од 2.035,12 долари за унца. Индексот за вредноста на доларот на „Блумберг“ се намали. Среброто е малку променето, додека платината и паладиумот поскапеа.