.webp){kind=icon}
Нафтата падна четврти ден по ред бидејќи загриженоста за американската економија и побавното закрепнување на Кина од очекуваното влијаат на изгледите. Разговорите во САД продолжуваат, со цел да се избегнат проблеми со долгот и неплаќање на обврските на државата поради ограничениот максимум за задолжување, при што министерката за финансии Џенет Јелен предупреди дека министерството може да остане без пари веќе на 1 јуни.
Движење на цената на ВТИ и нафтата брент / Bloomberg Mercury
Фјучерсите на ВТИ утрово паднаа под 70 долари за барел откако ја заокружија четвртата последователна неделна загуба, што е најдолг таков период од септември. Конкретните бројки покажуваат дека ВТИ за испорака во јуни падна за 0,8 отсто, на 69,47 долари, а за исто толкав процент се намали и цената на нафтата брент за испорака во јули, со тоа што таа сега се тргува за 73,54 долари за барел.
Цената на нафтата годинава е намалена за 13 проценти бидејќи стравувањата за можна рецесија во САД ги надминуваат вестите за намалување на понудата од страна на Организацијата на земји извознички на нафта и нивните сојузници (ОПЕК+). Побарувачката за барели исто така се чини слаба, додека маржите на рафинериите, односно профитот што рафинерите го остваруваат од преработка на сурова нафта во нафтени деривати, како дизел и бензин, остануваат ниски.
Инвеститорите оваа недела ќе ги следат клучните економски податоци од Кина за индиции за темпото на закрепнување на националната економија, како и месечниот извештај од Меѓународната агенција за енергија што треба да се објави утре.
„Сентиментот на нафтениот пазар останува негативен, со неизвесна перспектива за побарувачката и загриженост за плафонот на американскиот долг. Пазарот најверојатно ќе внимава на какви било потенцијални ревизии на побарувачката во месечниот извештај за пазарот на Меѓународната агенција за енергија“, рече Ворен Патерсон, раководител за стратегијата со стоки за ИНГ (ING Groep NV).
