text size
Индустриската побарувачка за гас во најголемите европски земји и натаму е намалена и покрај пониските цени бидејќи економското забавување ја оптоварува потрошувачката, а клиентите се насочуваат кон обновливи извори на енергија.
Побарувачката за гориво во Германија, Италија, Холандија, Франција, Шпанија и Велика Британија во мај падна за 9,7 проценти споредено со истиот месец претходната година, покажуваат податоците на „S&P Global Commodity Insights“. Тоа значи дека потрошувачката е помала од минатата година, кога Европската унија се обидуваше да го заштеди гасот пред да настапи зимата.
Иако тоа е најмалиот пад од кој било месец оваа година, сепак тој нагласува дека европските индустрии се борат да се вратат од енергетската криза што следеше по руската инвазија врз Украина.
Индустриската активност во еврозоната се намалува, а постојат стравувања дека одредено уништување на побарувачката може да биде трајно. Од „S&P Global Commodity Insights“ велат дека има и специфични фактори што влијаат на побарувачката од некои од најдинамичните сектори во Европа. Кај хемикалиите, на пример, падот на цената на амонијакот го поттикна континуираниот увоз од САД и Тринидад и Тобаго, додека сезонското одржување од страна на рафинериите ја намали потрошувачката на гас во мај. Падот на побарувачката за индустриски гас минатиот месец беше особено остар во Германија, земјата која е погодена од рецесија. Таму потрошувачката на гас се намали за дури 15 проценти.
Bloomberg Mercury
Клучните потрошувачи, од хемиски компании до производители на челик, не сакаат да ја обноват побарувачката откако рекордниот пораст на цените на енергијата минатата година ги натера да го ограничат производството. Тоа придонесе референтните европски цени на гасот оваа година да се намалат за дури 60 проценти. Купувачите, исто така, за напојување на нивните фабрики се насочуваат кон алтернативни извори на енергија, како ветер и сончева енергија.
Земјите на ЕУ поставија доброволни цели за намалување на потрошувачката на гас за 15 проценти во периодот меѓу август 2022 година и март оваа година, но тоа делумно се исполни благодарение на благата зима и повисоките цени кои ја намалија побарувачката. Блокот се обидува драстично да ја намали зависноста од руските фосилни горива.
.webp){kind=icon}
