Се заканува скок на цената на гасот, клучните преговори се водат во Австралија

Разговори меѓу најголемиот австралиски извозник на течен природен гас (ЛНГ) и неговите вработени започнаа во средата наутро, бидејќи заканата од намалување на снабдувањето продолжува да ги нарушува светските пазари.

Компанијата „Вудсајд енерџи“ (Woodside Energy Group Ltd.) и претставниците на работниците во нејзината фабрика за ЛНГ почнале разговори во Перт, за да преговараат за платите и условите, според извори на „Блумберг“ запознаени со ова прашање. Се очекува разговорите да продолжат до вечер.

„Офшор алајанс“ (Offshore Alliance), група што ги претставува двата најголеми работнички синдиката, претходно соопшти дека ќе започне со штрајкови веќе на 2 септември доколку в среда не се постигне договор.

Ризикот од нарушување на извозот на ЛНГ од Австралија, која е еден од најголемите доставувачи во светот, месецов ги зголеми цените во Азија и ви Европа. Штрајковите во објектите на „Вудсајд“ и „Шеврон“, кој исто така се соочува со закани за прекин на работата, би можеле да го намалат снабдувањето со ЛНГ во светот за 10 отсто, додека наближува зимата на северната хемисфера.

Азиските купувачи на ЛНГ се воздржуваат од купување и бараат поповолни услови за испорака за да ги избегнат негативните последици од штрајковите и намалувањето на снабдувањето. Не е јасно колку време ќе биде потребно штрајкот да почне да влијае на извозот.

Разговорите „добро напредуваат“, изјави во вторникот извршната директорка на „Вудсајд“, Мег О'Нил, истакнувајќи дека договорот ќе треба да го опфати целиот аранжман за вработување и дека ова не се само преговори за плата.

„Вудсајд“, најголемиот австралиски производител на нафта и гас, во вторникот изјави дека профитот во првата половина се зголемил бидејќи рекордното производство го компензирало падот на цените.