Европа го забрани најголемиот дел од увозот на руска нафта пред речиси една година, но сега се потпира на дизелот што можеби е направен од руска сурова нафта. Увозот на дизел во Европа од Индија, еден од најголемите купувачи на руска сурова нафта, е на пат да се зголеми до 305.000 барели дневно, што е најмногу од јануари 2017 година, покажаа податоците на „Кплер“.
Иако не може со сигурност да се каже дека молекулите се од руско потекло, бидејќи Индија преработува нафта и од други земји, пратките на Москва им дадоа на индиските рафинерии можност да произведуваат многу дизел и да го зголемат извозот.
Пристигнувањата во Европа во ноември вклучуваат ретка пратка од „Најра енерџи“ (Nayara Energy Ltd.) од Мумбај, кој годинава увезе речиси 60 отсто сурова нафта од Русија, наведува „Кплер“. „Релианс“ (Reliance Industries), најголемиот европски снабдувач на индиски дизел, црпи повеќе од една третина од својата сурова нафта од Русија, покажуваат бројките.
Depositphotos
Зголемувањето на увозот на дизел од Индија исто така илустрира фундаментална промена во трговијата со нафта од војната во Украина. Пред една година Русија беше најголемиот снабдувач на дизел во Европа, гориво од витално значење за индустрискиот и транспортниот сектор. Европската Унија го забрани најголемиот дел од морски увоз на руска сурова нафта во декември и нафтени деривати во февруари.
Како одговор, Европа и Велика Британија бараа снабдување со дизел од други пазари. Индија помага да се пополни јазот во понудата бидејќи европскиот увоз од САД, Турција и од Саудиска Арабија падна во ноември. Се очекува увозот на дизел од Саудиска Арабија да падне на околу 94.000 барели дневно, што е најниско од февруари 2020 година.
„Достапноста на саудиските барели нагло падна во октомври и ноември поради планираното одржување на локалната рафинерија, што го зголеми интересот за индискиот дизел“, рече Јуџин Линдел, шеф за рафинирани производи во индустрискиот консултант „Фактс глобал енерџи“ (Facts Global Energy).
Конкурентна предност
Додека Западот ја избегнува руската нафта, Москва откри зголемен апетит за својата нафта во Азија. Индиските рафинери успеаја да купат руска нафта со попуст и да ја продаваат рафинираната нафта на пазари како што е Европа, каде што дизелот е баран.
„Вкупно 1,6-1,8 милион барели дневно руска нафта што индиските рафинери ја купуваат создава конкурентска предност што другите ја немаат“, рече Виктор Катона, водечки аналитичар за сурова нафта во „Кплер“.
„Уделот на Индија во протокот на дизел во Азија сега претставува околу 19 отсто од вкупниот извоз на гориво на земјата, во споредба со 33 отсто минатата година“, рече тој. Голем дел од тој том беше пренасочен во Европа. Севкупно, европскиот увоз на дизел и бензин месецов треба да порасне на 935.000 барели дневно, што е зголемување од пет проценти во однос на октомври, покажуваат податоците на „Кплер“.
.webp){kind=icon}
