Eвропската унија се подготвува да предложи намалување на употребата на гасот за 15 отсто на доброволна основа во земјите членки почнувајќи од следниот месец заради загриженоста дека Русија ќе ја сопре испораката.
Планот треба да биде претставен денеска и може да стане задолжителен ако состојбата се влоши и доброволните ограничувања на гас не се доволни, велат европски дипломати.
По планот „Штедете гас за сигурна зима“, Комисијата планира да препорача чекори кои вклучуваат намалување на греењето и ладењето, како и пазарни мерки. Дури 1,5 отсто од БДП во регионот ќе биде загрозен во случај зимата да биде остра, стои во нацрт проценката на Комисијата до која Blooberg news имаше увид.
Најголем предизвк за ЕУ зимава ќе биде да обезбеди доволно снабдување со гас за печките и генераторите за струја.
Комисијата работи под претпоставка дека Русија нема да продолжи со целосни испораки низ гасоводот Северен Поток 1 кој порано овој месец беше затворен заради одржување, рече вчера еврокомесарот за буџет, Јоханес Хан. Цевководот работеше со 40 отсто капацитет пред почетокот на одржувањето.
Ограничените испораки на руски гас влијаеа на 12 земји членки на ЕУ и ја поттикнаа Германија минатиот мецес да го дигне алармот за опасност на второ највисоко ниво. Вкупните испораки од Русија во јуни беа пониски за 30 отсто од просекот во периодот 2016 – 2021, се наведува во документот.
Планираната уредба би и дала право на Комисијата да го подигне алармот на ниво на целата унија ако постои ризик од сериозен недостиг на гас или ако пообарувачката порасне, велат дипломати кои инсистираат на анонимност. ЕУ се уште не ги коментира нацрт правилата.
Мерките ќе треба да бидат одобрени од земјите членки, а одобрувањето би можело да биде побарано следната недела за време на итниот состанок на министрите за енергетика. Голем дел од земјите се против задолжителните кратења, тврдејќи дека владите веќе имаат итни планови и дека побарувачката ќе биде намалена без разлика дали на тоа ги обврзува ЕУ, велат дипломатите.
.webp){kind=icon}