-orig.png)
Нафтата напредуваше трет ден, што значи дека е на добар пат кон неделна добивка, бидејќи податоците за вработеноста во САД ја поддржуваат одлуката на Федералните резерви (Фед) да ги намалат стапките годинава, односно да ја олеснат монетарната политика.
Имено, првичните барања за бенефиции за невработеност во Америка се зголемија минатата недела - на највисоко ниво од август. Претставниците на Федералните резерви внимателно ги следат побарувачката на работна сила и растот на платите додека дебатираат кога би било соодветно да се намалат каматните стапки.
Брент се искачи над 84 долари за барел по дводневниот раст, во кој забележа зголемување од околу 1 процент, задржувајќи се над својот стодневен подвижен просек. Американската нафта ВТИ (WTI) е близу 80 долари, пишува „Блумберг“ (Bloomberg).
Доларот ослабе во четвртокот, правејќи ги суровините попривлечни за повеќето купувачи. Најновите добивки на суровата нафта потврдуваат релативно придушено движење на цените, при што фјучерсите ќе го забележат својот најтесен неделен опсег на тргување од март.
Севкупно, цените останаа повисоки годинава, потпомогнати од намалувањето на понудата на ОПЕК+, солидната глобална побарувачка и тековните тензии на Блискиот Исток. Организацијата на земјите извознички на нафта и нејзините сојузници треба да се состанат следниот месец за да одлучат за производството на црното злато во втората половина.
Како што рекоа аналитичарите Даниел Хајнс и Сони Кумари од АНЗ (ANZ Banking Group Ltd.), „континуираното намалување на производството треба да ги поддржи цените, иако пазарот е предмет на геополитички прашања“.
На Блискиот Исток, Израел изјави дека ќе ја продолжи борбата против Хамас во Појасот Газа дури и без американска помош, а американскиот претседател Џо Бајден претходно изјави дека ќе престане со понатамошна испорака на оружје за Израел доколку земјата изврши копнена инвазија на Рафа.
Потсетуваме, Израел за првпат од почетокот на војната го окупира преминот Рафа, главната влезна точка за хуманитарна помош во Газа и во исто време единствениот излез што не води кон израелска територија.
Тековни цени на нафтата
- Брент за јулско порамнување поскапе за 0,4 отсто, на 84,23 долари за барел, во 10.05 часот во Сингапур;
- Суровата нафта ВТИ за испорака во јуни поскапе за 0,5 отсто, на 79,67 долари за барел.
.webp){kind=icon}
