.webp){kind=icon}
Нафтата ја отвори неделата пониско, додека пазарот чека да види дали Израел ќе му возврати на Техеран за минатонеделниот ракетен напад, а американскиот претседател Џо Бајден рече дека не поддржува напади врз иранските постројки за сурова нафта.
Брентот падна под 78 долари за барел по неговиот најголем скок од јануари 2023 година минатата недела, додека ВТИ (West Texas Intermediate) беше близу 74 долари. Бајден во петокот рече дека не знае кога ќе дојде одговорот на Израел, но дека „би размислувал за други опции освен за удар на нафтените полиња“.
Нападот на Иран врз Израел предизвика страв од сеопфатна војна на Блискиот Исток и наплив на промени на пазарот на опции. Сепак, прашањата за изгледите за побарувачката - особено од увозникот број еден, Кина - и прекумерната понуда продолжуваат да висат над овој пазар.
Блискиот Исток и понатаму е на работ од ескалација, при што Израел испрати војници назад во северниот дел на Газа во текот на викендот и продолжува со воздушните напади и ограничените копнени маневри во Либан. Производството на нафта во Иран се врати на речиси полн капацитет и може да биде ранливо поради ескалацијата на тензиите.
ICE, Bloomberg
Пазарот е „засега во игра на чекање“ бидејќи трговците очекуваат јасност околу случувањата на Блискиот Исток, рече Јип Јун Ронг, пазарен стратег во ИГ (IG Asia Pte) во Сингапур. Секој удар врз енергетската инфраструктура на Иран „може да доведе до зголемување на цената на брентот над 80 долари“.
Пазарите за нафтени опции и понатаму ја одржуваат својата пристрасност кон биковски ориентирани куповни опции - кои обезбедуваат добивки за купувачите кога фјучерсите се зголемуваат. Мерачот на имплицитната нестабилност за брентот беше близу највисокото ниво во речиси една година.
„Голдман Сакс“ (Goldman Sachs Group Inc.) прогнозира дека брентот би можел да порасне до 90 долари ако се наруши снабдувањето со нафта од Иран, велат аналитичарите, вклучувајќи го и Даан Струјвен. Сепак, „ЏП Морган“ (JPMorgan Chase & Co.) оцени дека нападот врз енергетските капацитети во Техеран нема да биде посакуван начин на дејствување.
Саудиска Арабија, пак, ја зголеми својата главна цена на нафтата за купувачите во Азија за поголема сума од очекуваната, а истовремено ги намали цените за сите видови нафта извезени на американскиот и европскиот пазар.
Кина во вторник ќе одржи брифинг со новинарите на кој ќе разговара за пакетот политики насочени кон поттикнување на економскиот раст, соопшти земјата во неделата. Се зголемуваат очекувањата меѓу аналитичарите дека Пекинг ќе ја прошири јавната потрошувачка како дел од стимулативниот пакет.
Цени:
- Брентот за декемвриско порамнување поевтини за 0,4 отсто, на 77,72 долари за барел, во 12 часот во Сингапур;
- ВТИ за испорака во ноември падна за 0,3 отсто, на 74,15 долари за барел.
