text size
Нафтата падна за повеќе од шест проценти во почетокот на овонеделното тргување откако израелските напади врз цели во Иран ги избегнаа погоните за сурова нафта на членката на Организацијата на земји извознички на нафта (ОПЕК).
Нафтата брент падна под 72 долара за барел, а ВТИ (WTI-West Texas Intermediate) се тргува на ниво од близу 68 долари. Израелски авиони во саботата нападнаа воени цели низ Иран, исполнувајќи го ветувањето дека ќе се одмаздат за ракетниот напад на почетокот на месецов.
Конкретно, нафтата брент за испорака во декември утрово падна за 6,2 отсто, на 71,37 долар, додека нафтата ВТИ за испорака во декември се лизна за 6,4 проценти, со што барел се тргува по цена од 67,22 долари.
Сепак, со нападите се избегнаа нафтените погони и нуклеарната и цивилната инфраструктура во согласност со барањето на администрацијата на американскиот претседател Џо Бајден.
Bloomberg Mercury
Иранските државни медиуми соопштија дека нафтените капацитети во земјата работат нормално, иако Министерството за надворешни работи на земјата соопшти дека нивниот одговор ќе биде соодветен на извршениот напад.
Ракетниот напад на Иран на 1 октомври ја врати воената премија на нафтата што на моменти во текот на месецов ја туркаше глобалната референтна вредност на нафтата брент на ниво од над 80 долари за барел. Сепак, цените сега се речиси 20 долари пониски од првата сесија на тргување во октомври бидејќи слабата кинеска побарувачка и очекувањата за прекумерна понуда на почетокот на следната година ги притиснаа цените во последниве месеци.
„Може да видиме дополнителен краткорочен надолен притисок бидејќи геополитичката премија е намалена“, рече Арне Ломан Расмусен, главен аналитичар во „Еј/ес глобал риск менаџмент“ (A/S Global Risk Management).
Денешниот ценовен пад доаѓа во пресрет на неколкунеделен период што е клучен за цените, при што се наѕираат мноштво влијателни настани, вклучувајќи ги и изборите во САД.
ОПЕК + (Организацијата на земји извознички на нафта и нивните сојузници) планира во декември постепено да го оживува производството на нафта, а пазарот е во исчекување на какви било промени во таа временска рамка.
Иако планираното зголемување на производството на краток рок е мало, тоа ќе ги зголеми резервите на пазарот за кој Меѓународната агенција за енергетика прогнозира дека нема да има потреба од зголемено производство.
.webp){kind=icon}
