Цената на нафтата благо расте по дводневниот пад

Цената на нафтата благо порасна – по најголемиот дводневен пад од 2022 година-додека трговците ги проценуваа последиците од примирјето меѓу Иран и Израел, како и извештајот од индустријата што укажува на нов пад на резервите на нафта во САД.

Брент нафтата порасна за околу 1 отсто и се приближи до 68 долари за барел, откако во претходните два дена  опадна за 13 отсто, додека нафтата Вест Тексас Интермедиет (ВТИ) се искачи над 65 долари. По краткиот вооружен судир, Израел и Иран изгледа го почитуваат примирјето посредувано од американскиот претседател Доналд Трамп, што ги намали ризиците по снабдувањето со нафта од регионот.

Bloomberg Mercury

Исто така, во вторникот, Трамп ѝ даде зелено светло на Кина — најголемиот купувач на иранска нафта — да продолжи со купувањето, обидувајќи се да го зајакне прекинот на огнот. Тој потег изгледа ги поткопа долгогодишните американски санкции против Техеран. Висок претставник на Белата куќа подоцна посочи дека ограничувањата кон Иран сепак ќе останат на сила.

Глобалниот пазар на нафта оваа недела се соочи со голема нестабилност, обележана со брзи промени во расположението. Цените најпрво нагло скокнаа откако САД ги бомбардираа иранските нуклеарни објекти за време на викендот, што предизвика загриженост за снабдувањето со сурова нафта. Но, потоа остро паднаа кога Белата куќа објави примирје меѓу Техеран и Израел. Очигледната промена на американската политика во врска со извозот на иранска нафта дополнително придонесе за падот.

„Лесна корекција нагоре во цените на суровата нафта е очекувана по дводневниот пад“, изјави Вандана Хари, основач на „Ванда инсајтс“. „Додека пазарот уште некое време ќе го следи кревкото примирје, фокусот ќе се префрли назад кон економската слика, исходот од трговските преговори на САД и состојбата со ОПЕК+.“

Алијансата ОПЕК+ треба да одржи видеоконференција на 6 јули за да размисли за ново зголемување на понудата во август. Во меѓувреме, крајниот рок што Трамп си го постави за постигнување трговски договори со главните партнери на САД е 9 јули. Земјите што немаат постигнат договор ќе се соочат со т.н. тарифи од „Денот на ослободувањето“.

Резервите на сурова нафта во САД се намалиле за околу 4,3 милиони барели минатата недела, според процената на Американскиот нафтен институт. Официјалните податоци – според кои претходната недела резервите се намалиле за повеќе од 11 милиони барели – треба да бидат објавени подоцна во среда.

По турбуленциите предизвикани од кризата на Блискиот Исток, некои пазарни показатели повторно покажуваат на потенцијална слабост на пазарот — разликата во цените на Брент за декември оваа и наредната година повторно е во контанго (состојба кога цената на фјучерсите за испорака во иднина е повисока од тековната (спот) цена на суровината).