Нов рекорд на златото по последната ескалација на трговските тензии меѓу САД и Кина

Златото порасна на нов рекорд, поттикнато од ескалацијата на несогласувањата меѓу САД и Кина и облозите дека Федералните резерви (Фед) ќе ги намалат каматните стапки уште двапати годинава.

Златото денеска се искачи дури за 1,2 отсто, на нов врв од 4.193,65 долари за унца. Среброто напредуваше по вчерашниот нестабилен ден, кога цената скокна на рекордно високо ниво над 53,54 долари за унца, пред нагло да падне поради знаците дека историскиот притисок почнува да се намалува.

Приносите на американските државни обврзници паднаа на најниски нивоа од 2022 година, откако претседателот на Федералните резерви, Џером Пауел, сигнализираше дека централната банка на САД е на пат овој месец да спроведе уште едно намалување од четвртина процентен поен. Пониските приноси и трошоците за позајмување вообичаено им користат на благородните метали, за кои не се плаќа камата.

Bloomberg Mercury

 

Во меѓувреме, откако американскиот претседател Доналд Трамп изјави дека можеби ќе престане да тргува со масло за готвење со Кина, пазарите ги зафати расположение за избегнување ризик, што инаку ја зголемува привлечноста на златото како засолниште. Коментарите внесоа нови тензии во односот меѓу двете најголеми економии во светот, при што Пекинг вети дека ќе возврати откако Вашингтон минатата недела се закани со дополнителни царини од 100 проценти за Кина.

Кај среброто, пазарот е зафатен од недостиг од ликвидност во Лондон, предизвикувајќи светска потрага по металот и поттикнувајќи ги референтните цени да се искачат над фјучерсите во Њујорк. Јазот меѓу двата пазара вчера малку се намали откако паднаа цените во Лондон, а почна да паѓа и цената за позајмување сребро во градот. И покрај тоа, цените на овој метал и натаму се на многу високи нивоа.

Трговците и натаму се внимателни пред завршувањето на таканаречената истрага на американската администрација по членот 232 за критични минерали - што ги вклучува среброто, платината и паладиумот. Истрагата ги оживеа стравувањата дека металите би можеле да бидат опфатени со нови царини, дури и откако официјално беа ослободени од давачки во април.

Четирите главни скапоцени метали годинава поскапеа меѓу 58 и 82 проценти, раст што доминираше на пазарите на стоки. Ценовниот напредок на златото е поткрепен со купување од страна на централните банки, зголемување на уделите во фондови што се тргуваат на берза и намалување на каматните стапки од страна на Фед.

Побарувачката за засолништа е потпомогната од постојаните трговски тензии меѓу САД и Кина, како и од заканите за независноста на Фед.

„Купувањето засолништа, како злато и сребро, продолжува бидејќи трговските тензии меѓу САД и Кина ја зголемија дополнителната неизвесност, а очекувањата за понатамошно намалување на каматните стапки во САД се дополнителен стимул на бумот“, изјави Манав Моди, аналитичар за благородни метали во „Мотилал освал фајненшл сервисис“ (Motilal Oswal Financial Services Ltd).

Во рамките на утринското азиско тргување, спот златото се тргуваше за 1,1 отсто повисоко, односно за 4.187,54 долари за унца. Индексот на „Блумберг“ за вредноста на доларот се намали. Среброто порасна за речиси два отсто, а раст забележаа и платината и паладиумот.